Serikali yawasamehe wafanyabiashara kulipa kodi

Kwa ufupi

Ni kwa wale wenye mauzo yasiyozidi Sh4 milioni

By Lauden Mwambona

Mbeya. Serikali imekubali kupunguza viwango vya kodi kwa wafanyabiashara na kuiondoa kwa wale wenye mauzo yasiyozidi Sh4 milioni kwa mwaka.

Meneja wa Mamlaka ya Kodi Tanzania (TRA) Mkoa wa Mbeya, Arnold Maimu, alisema Serikali kupitia kwa Kamishna Mkuu wa Mamlaka hiyo, ilimaliza mgogoro na wafanyabiashara kuhusiana na viwango vya kulipa kodi.

Maimu alisema ushirikiano wanaotoa wafanyabiashara kwa sasa umeleta mafanikio katika kukusanya kodi. Mwenyekiti wa wafanyabiashara, Charles Syonga, alisema Serikali ilisikiliza kero zao na sasa mambo ni shwari.

Alisema hivi sasa wanawahamasisha wafanyabiashara wote kulipa kodi TRA baada ya kuridhishwa na makubaliano hayo.

Syonga alisema wafanyabiashara wenye mauzo hadi Sh7.5 milioni sasa, watalipa kodi ya Sh150,000 kwa mwaka badala ya Sh200,000 iliyopangwa awali.

Ofisa Elimu kwa Walipakodi kutoka TRA Mkoa wa Mbeya, Kissa Kyejo, alisema Serikali pia ilikubaliana na wafanyabiashara kwamba watakoingizwa kwenye utaratibu wa VAT ni wenye mauzo yanayoanzia Sh100 milioni badala ya wale wa Sh40 milioni.

Awali wafanyabishara mkoani hapa walikuwa na mgogoro na TRA kuhusiana na kutakiwa kulipa kodi kwa viwango vilivyowekwa na Serikali.

Created by Gazeti la Mwananchi