Magufuli atangaza neema

Mgombe Urais wa Jamhuri ya Muungano kupitia CCM, Dk John Magufuli akiwapungia mkono wananchi alipokuwa akiwasili katika mkutano wa kampeni kwenye Uwanja wa Ali Hassan Mwinyi mjini Tabora jana.

MGOMBEA urais wa Chama Cha Mapinduzi (CCM), Dk John Magufuli, ametangaza mbinu mbalimbali zitakazoleta neema nchini, endapo atachaguliwa katika uchaguzi mkuu wa Oktoba 25, mwaka huu.
Pia, Magufuli ameeleza mbinu ya kuondoa ukosefu wa madawati katika shule mbalimbali nchini, kwamba ni kuwalazimisha wakurugenzi wa halmashauri zenye shule hizo kukaa chini maofisini mwao.
Akizungumza katika mkutano uliohudhuriwa na maelfu ya wakazi wa Tabora katika viwanja vya Ali Hassan Mwinyi jana jioni, Dk Magufuli alisema atapitia upya utaratibu wa kuwataka wahitimu wa vyuo mbalimbali kuwa na uzoefu, kabla ya kuajiriwa katika nafasi mbalimbali za kazi, zinazotangazwa katika utumishi wa umma.
Huku akishangiliwa na wananchi, alisema serikali yake itashusha bei ya vifaa vya ujenzi hasa saruji, mabati na misumari, ili wananchi wanaofanya kazi wajenge nyumba bora. Alisema atataka kila anayefanya kazi apate kipato kizuri kitakachomsaidia kukabiliana na mahitaji ya maisha yake, ikiwemo kujenga nyumba bora kutokana na kushushwa kwa bei za bidhaa za ujenzi.
Katika kuongeza idadi ya Watanzania wanaofanya kazi za kujiajiri, Dk Magufuli alisema katika kila mtaa na kijiji, Serikali yake itatoa Sh milioni 50 kwa ajili ya kuanzisha na kukuza biashara ndogo za wanawake na vijana.
Aidha, Dk Magufuli alisema nchi ina misitu ya kutosha, hivyo haiwezekani wanafunzi wakae chini huku wakurugenzi wakifurahia kiyoyozi ofisini kwao. Alisema kwamba atawalazimisha wakurugenzi wa halmashauri zenye shule zisizo na madawati, kukaa chini maofisini mwao.
Mbali na kutoa mikopo hiyo izunguke katika ngazi ya kijiji na mtaa, Dk Magufuli alisema Serikali yake itazuia usumbufu unaofanywa kwa wafanyabiashara hao, ikiwemo kukamatwa kwa madereva wa bodaboda na mama lishe.
Kwa wakulima, alisema atahakikisha pembejeo sahihi, zinatolewa kwa wakati na mazao yatakayovunwa, na itakuwa marufuku kwa Serikali kukopa mazao yao. Aliahidi kuondoa ushuru unaosumbua wafanyabiashara wadogo na hasa wakulima.
Katika elimu, aliahidi kuhakikisha kuanzia mwakani, wanafunzi kutoka darasa la awali mpaka kidato cha nne, wanasoma bila kulipa ada ili kuondolea wazazi usumbufu wa watoto wao kurudishwa nyumbani kwa kukosa ada.
Kauli ya Kinana
Katibu Mkuu wa CCM, Abdulrahman Kinana, alisema alipita katika Mkoa wa Tabora na kukuta Hospitali ya Mkoa imetelekezwa haijajengwa kwa miaka miwili, wakati mkandarasi ameshalipwa, akapiga kelele mkandarasi huyo akaondolewa na sasa inajengwa.
AlisemaTabora wanalima tumbaku, lakini kati ya mkulima na mnunuzi kuna watu wengi wa kati, ikiwemo ushirika, Bodi ya Tumbaku na Apex na kuhoji huyo mkulima lini ataondokana na umasikini?
Mbali na wakulima, Kinana alisema pia kuna vijana wanatafuta riziki kwa kuchimba madini, lakini hawana maeneo ya kuchimba wakati kuna watu wameshika maeneo makubwa, lakini hawachimbi madini na vijana hao wakienda kuchimba wanakamatwa.
Katibu Mkuu huyo alisema kama Dk Magufuli alishughulikia makandarasi wazembe na wakati huo kulikuwa na mtu juu yake akimtuma, akiwa yeye ndiye Rais, atakuwa kiboko ya kero hizo zote ;na kuomba wananchi wamuamini na kumpa kura nyingi.
“Mchagueni Magufuli…Ni mzalendo, hodari, mchapakazi, haogopi mtu na hapendelei mtu” alisema Kinana, akiowaomba wakazi hao wa Tabora, kumpigia kura nyingi Dk Magufuli siku ya kupiga kura.
Sitta naye Spika mstaafu, Samuel Sitta akizungumza katika Uwanja wa Ali Hassan Mwinyi, Tabora Mjini jana alisema kumpata rais si suala la ushabiki, ni la kutafakari na kufikiria kwa makini kwa kuwa wananchi wakikosea, wanaweza kutumbukiza nchi pabaya.
Alisema CCM ina utaratibu mzuri wa kumpata mgombea urais na mgombea akipita katika utaratibu huo, wengine wote humuunga mkono na kumkubali kuwa ndiye waliyeletwa na Mungu.
Alisema baada ya kumpata Dk Magufuli, hata yeye aliyewania kuteuliwa kugombea urais, wameridhia kuwa ndiye waliyeteuliwa na Mungu, isipokuwa mmoja wao, Edward Lowassa, ambaye alipata ghadhabu na kuondoka.
Kwa mujibu wa Sitta, Lowassa hakutosha katika vigezo kama ilivyokuwa kwa wengine na kueleza kuwa wanalazimika kumchambua kwa kuwa anawania nafasi kubwa ya urais wa nchi na kuongeza kuwa, hata mtu anapochumbia ama kuchumbiwa,Watanzania hutazama tabia ya mchumba na anakotoka.
Katika uchambuzi wake, alibainisha kuwa yeye Sitta mwaka 1995 Lowassa alipogombea urais ndani ya CCM, alimtetea lakini baadaye aliitwa na Mwalimu Nyerere na kuelezwa kuwa hafai, kwa kuwa alipewa vyeo miaka miwili tu akapata mali nyingi, ikiwemo majumba aliyokodishia Wajapani mkoani Arusha.
Sitta alisema hata Rais Kikwete alimjaribu kwa kumpa uwaziri mkuu, lakini katika miaka miwili tu aliharibu akakunjua makucha na kumkumbusha usemi wa wahenga uliosema kuwa, ukitaka kumfahamu mtu mpe fedha au cheo

Created by gazeti la Habari leo