Lowassa, huu ni ‘muziki mkubwa’ -Msukuma

MWENYEKITI wa CCM mkoa wa Geita, Joseph Msukuma akihutubia mkutano wa hadhara mjini Chato.

MWENYEKITI wa CCM mkoa wa Geita, Joseph Msukuma amemvaa mgombea wa urais kupitia Chadema, Edward Lowassa na wengine waliohamia Ukawa akisema wanashukuru chama kimetua mzigo.
Msukuma, ambaye anaaminika kuwa swahiba wa Lowassa wakati wa mchakato wa kura ya maoni kwenye CCM, aliuambia mkutano jana kwamba hakuna anayefahamu siri za Lowassa.
“Nataka nimwambie ndugu yangu, rafiki yangu Lowassa, huu ni muziki mkubwa,” alisema Msukuma kwenye mkutano wa kampeni wa mgombea wa urais wa CCM, Dk John Magufuli uliofanyika jana mjini Chato, mkoani Geita.
Msukuma ambaye aliponda waliohama CCM baada ya kura za maoni kwa kutaja majina ya baadhi, akiwalinganisha na bendera inayofuata upepo na kusisitiza kuwa wenye akili hawahami.
“Tumeshukuru sana CCM tumetua mizigo…”, alisema Msukuma ambaye ni mgombea ubunge, Jimbo la Geita Vijijini akiwataja Lawrence Masha, Msindai, Mngeja akisema wamehamia Ukawa si kwa mapenzi mema isipokuwa, ni kutokana na kukosa ushindi kwenye kura za maoni.
“Tuna hasara gani Masha akihama CCM?” alihoji umati ambao uliitikia kwa kusema hakuna hasara. Msukuma ambaye alikuwa miongoni mwa viongozi wa CCM waliohudhuria mkutano wa Lowassa uliofanyika Arusha wakati wa mchakato wa kura za maoni, akisifia mkutano wa jana wa Magufuli, alisema, “Toka niwe mwenyekiti sijawahi kuona watu wengi kama hawa.
Hata nilipoteremka Arusha na chopa, haikuwa hivi.” Alieleza kushangazwa na baadhi ya picha zilizooneshwa kuwa ni za mkutano wa Lowassa mjini Chato na kusema mandhari iliyooneshwa, haikuwa ya uwanja huo wa stendi.
“Stendi ya Chato haina miembe wala lami,” alisema. Akiendelea kuponda waliohama, alisema, kama Dk Magufuli angekuwa anatoa rushwa, wasingehama. “Hakuna hasara na wote waligombea wakashindwa,” alisema na kueleza kumfahamu Mngeja kwa kuwa walikuwa wakikaa kwenye helikopta moja.
“Tunaomba wachukue na wengine wenye tabia kama hizo. Wenye akili timamu tutabaki CCM...Mgombea wetu (Magufuli) anatosha. Na hapa ndiyo kwao…nimetembea na Lowassa gari moja, ndege moja, tunachagua rais na sio bora rais…,” alisema.
Alisisitiza, “Katika Kanda ya Ziwa, hakuna aliye na siri za Lowassa kama mimi…naomba waniweke kwenye mdahalo nitagharimia, niwapige kavu kavu. Watu wanaokwenda kule (Ukawa) zinatangulizwa hela. Nani anachukia hela?.”
Aliendelea kusema, “najua mengi ya kambi ile nilikwenda kufanya kazi. Hata wale wachungaji waliokwenda Dodoma, ni wachungaji feki walionunuliwa.” Mke wa Magufuli Mke wa Magufuli, Janeth, alishukuru wana Chato kwa kumpa heshima kubwa mbunge wao kwa kipindi chote cha miaka 20 hadi chama kikamteua kuwa mgombea urais.
Wakati akizungumza, zilisikika sauti kutoka kwenye mkutano zikishangilia ‘rais rais’. Mke huyo wa mgombea aliomba Oktoba 25 wana Chato wamchague kwa wingi. Aliomba pia wamchague Dk Medard Kalemani kuwa mbunge wa Chato. Ameomba pia wachague madiwani wa CCM wapeperushe bendera vyema.

Created by Gazeti la HabariLeo