Mufti aonya kuchagua kiudini

Mufti Mkuu wa Tanzania, Shehe Abubakar Zubery

MUFTI Mkuu wa Tanzania, Shehe Abubakar Zubery amewataka wagombea wa nafasi mbalimbali za uongozi katika uchaguzi mkuu wa mwaka huu, kuacha kutumia nyumba za ibada kuomba kura.
Amewataka pia Waislamu kutomchagua kiongozi kutokana na udini wake, kabila lake na wala aina yoyote ya sera zenye kuweza kuhatarisha amani ya taifa.
Mufti huyo alisema hayo juzi usiku katika hotuba yake aliyoitoa wakati wa swala ya kumkaribisha baada ya kuchaguliwa kushika wadhifa huo.
Hafla hiyo iliyofanyika katika Makao Makuu ya Baraza Kuu la Waislamu Tanzania (BAKWATA) ilihudhuriwa pia na Rais mstaafu wa Awamu ya Pili, Ali Hassan Mwinyi pamoja na idadi kubwa ya waislamu.
Katika hotuba yake hiyo kabla ya kumkaribisha Mwinyi, Mufti alisema kuwa Tanzania ni nchi ambayo imekuwa ikisifiwa kwa amani kila kukicha na kuna kila sababu ya kuendeleza amani hiyo. Alisema kuwa Watanzania wanaweza kuipoteza amani hiyo wasipokuwa makini na masuala yanayohusu ubaguzi wa kidini kwani amani hiyo inaweza kupotea.
“Najua mwaka huu tunachagua viongozi kuanzia Madiwani, Wabunge na Rais pia, hivyo ningependa kuwataka wale wote ambao wanatumia nyumba za ibada kama misikiti na kwingineko kuomba kura kwa kisingizio cha udini kuacha tabia hiyo,” alisema Mufti.
Alisema kuwa sio kitu kizuri kutumia nyumba za ibada kuombea kura kwa mtazamo wa kiubaguzi wa kidini kwa kuwa inaweza kuleta mpasuko wenye kuathiri amani.
Aliongeza kuwa Watanzania wanatakiwa kumchagua kiongozi ambaye anapenda maendeleo, mfanyakazi na mwenye hofu ya Mungu ili kuwaunganisha watanzania wote kuwa kitu kimoja.
“Kura ni haki yako ndugu Mwislamu wala usidanganywe kuwa kuna uwezekano kuwa kupiga kura sio sehemu ya uislamu ila mfahamu kuwa ni moja kati ya haki zenu za msingi kabisa”.
Aliwataka pia Waislamu nchi nzima kutumia baraza hilo kama kiunganishi chao kuwa kuwa baraza hilo lipo kwa kwa ajili yao. Kwa upande wake Rais mstaafu Mwinyi alisema kuwa Tanzania imekuwa ikisifiwa kwa amani na huu sio wakati wa kuipoteza ila ni wakati wa kuiendeleza kwa mustakabali wa taifa.
Aliwataka vijana kuepuka kutumiwa hovyo na watu kwa lengo la kuvuruga amani na badala yake wawe mstari wa mbele katika kuidumisha

created by Gazeti la Mtanzania