Akizungumza na wakazi wa Tabora katika maeneo tofauti, Kiongozi wa chama hicho, Zitto Kabwe alisema ACT-Wazalendo imeandaa mpango maalumu ambao umeainishwa katika ilani yao ya uchaguzi, ambayo inalenga kuwakomboa wananchi.
Zitto alisema wagombea mbalimbali wamekuwa wakitoa ahadi lukuki wakijinadi kutatua tatizo la maji kwa wananchi wa vijijini, lakini hazijatekelezwa kutokana na kwamba hawakuwa na mpango madhubuti wa kumaliza tatizo hilo.
“Kila watu 100 watu 62 vijijini hawana maji safi na salama huku ndiko wanakoishi watanzania wengi, sisi tutamaliza tatizo hilo,” alisema.
Ilani ya ACT -Wazalendo inasema chama kitaanzisha Mfuko wa Maji Vijijini utakaotumika kuendeleza na kulinda vyanzo vya maji vijijini na kukarabati miundombinu ya maji mijini na katika majiji.
Alisema wananchi watahamasishwa kuhusu umuhimu wa kuendelea kutunza vyanzo vya maji na mazingira kwa ujumla.
Zitto alisema wabunge waliopita mkoa wa Tabora hawakuwa na ushirikiano na walikuwa wakigombana bungeni kila mara, jambo ambalo lilifanya washindwe kutatua kero za wananchi waliowatuma na kuzitetea kwa pamoja.
“Wabunge wa Tabora sifa yao kubwa ni kugombana, sio kuzungumzia changamoto zao na wananchi wao, hawana umoja katika hoja zao,” alisema Zitto na kuwahakikishia wananchi hao kwamba sasa wanataka wabunge wa Kigoma na Tabora kushirikiana kuondoa matatizo ya mikoa hiyo.
Mgombea udiwani wa kata ya Kamsekwa kijiji cha Igagala, aliahidi atakapoingia madarakani atawasaidia wananchi kuchimba visima virefu, ambavyo vitawasaidia wananchi kuondokana na tatizo la kutembea muda mrefu kutafuta maji ambayo yanapatikana mbali na sio salama.
Aidha, aliahidi pia kuwasaidia wanawake kwa kununua gari aina ya Toyota Noah kwa ajili ya kubeba wagonjwa na kinamama wanaoenda kujifungua hospitali. Wananchi walilalamikia tatizo la maji safi na salama katika vijiji vyao kuwa ni kikwazo kikubwa na cha muda mrefu. Walisema hupoteza muda mwingi kutafuta maji.
Created by Gazeti la Habari leo
0 comments:
Post a Comment