‘Chadema inakubalika zaidi nje ya Ukawa’

MWENYEKITI wa Chadema, Freeman Mbowe amesema chama hicho kimechukua majimbo mengi katika kuachiana majimbo na kata, kutokana na makubaliano ya kuwa mgombea atasimamishwa kulingana na chama kinachokubalika katika jimbo husika.
Amesema hayo jana alipozungumza na waandishi wa habari jijini Dar es Salaam kuhusu mambo mbalimbali, ikiwemo taarifa kuwa Chadema inalenga kuvunja upinzani kutokana na mgawanyo wa majimbo kwa vyama vinavyounda umoja huo.
Kwa mujibu wa Mbowe, katika suala hilo la kuachiana majimbo, pia walikuwa wanaangalia katika uchaguzi wa mwaka 2010 jimbo hilo nani alishinda na aina ya mtu kama anaweza kuongoza au la.
Mbowe aliwajia juu Makamu Mwenyekiti wa NCCR Mageuzi, Leticia Mossore na Katibu Mkuu wa chama hicho, Mosena Nyambabe, kwa kumshutumu Mwenyekiti wao, James Mbatia kwa madai ya kutaka kuua chama chao cha NCCR-Mageuzi.
Alisema shutuma zilizotolewa na viongozi hao zinatokana na kutaka kuachiwa majimbo bila kuzingatia vigezo vilivyowekwa na umoja huo, ambapo alisema Mossore alitaka aachiwe jimbo la Segerea huku akijua wazi jimbo hilo walistahili kupewa Chadema.
“Kama mnakumbuka uchaguzi wa mwaka 2010 jimbo lile alishinda Mpendazoe wa Chadema, kwa hiyo hata mwaka huu ilitakiwa sisi ndiyo tusimamishe lakini viongozi wa CUF walikuja tukakaa mezani wakasema tumweke Mtatiro na tukakubali,” alisema.
Alisema Nyambabe alitaka aachiwe jimbo la Serengeti, ambapo alisema, kwanza hakubaliki lakini hata Uchaguzi Mkuu wa mwaka 2010, NCCR hawakupata kura katika jimbo, pia katika uchaguzi wa Serikali za Mitaa uliofanyika mwaka jana pia hawakuchukua mtaa wowote.
Created by Gazeti la Habari Leo