Neema ya gesi sasa ni dhahiri

Sehemu ya miundombinu ya kuchakata na kusafirisha gesi asilia kutoka Mtwara na Songo Songo hadi Dar es Salaam kupitia Somanga, iliyoko katika eneo la Madimba mkoani Mtwara.
RAIS Jakaya Kikwete jana alizindua miundombinu ya kuchakata na kusafirisha gesi asilia kutoka Mtwara na Songo Songo hadi Dar es Salaam kupitia Somanga.
Alizindua mtambo huo katika hafla iliyofanyika eneo la Madimba mkoani Mtwara.
Akizungumza na wananchi wakati wa hafla hiyo, Rais Kikwete alisema kuanza kazi kwa mitambo hiyo ni hatua muhimu kuelekea katika Taifa lenye uchumi wa kati.
Alifafanua kwamba hatua hiyo inatokana na kuimarika kwa huduma za nishati ya umeme pamoja na uchumi katika nyanja mbalimbali, ikiwemo viwanda kwa kuwa gesi hiyo itamaliza tatizo la umeme.
Rais Kikwete aliwaagiza wa tendaji wa Shirika la Umeme nchini (Tanesco) na Shirika la Maendeleo ya Petroli (TPDC), kuwa makini katika mchakato wa ununuzi mitambo ya kufua umeme, kwa kufuata sheria ili matatizo yaliyowahi kulikumba Taifa kutokana na ukiukwaji wa taratibu mwaka 2006 wakati wa uhaba wa umeme, yasijirudie tena.
Rais Kikwete aliishukuru Serikali ya China kwa kuwa tayari kujenga miundombinu hiyo.
Aliagiza mamlaka husika kutoa huduma muhimu za jamii, ikiwa ni pamoja na upatikanaji wa maji safi na salama, pamoja na barabara kwa wakazi wa Mtwara ili wanufaike na gesi hiyo.
TPDC Awali akitoa maelezo ya utangulizi, Mkurugenzi Mtendaji wa TPDC, Dk James Mataragio alisema miundombinu hiyo imekamilika na tayari gesi imeshaanza kusukumwa kutoka Mtwara hadi Dar es Salaam. Dk Mataragio alisema ujenzi wa miundombinu hiyo, umegharimu dola za Marekani bilioni 1.53, sawa na Sh trilioni 2.926 za Tanzania.
Alisema asilimia 95 ya fedha hizo, zimetokana na mkopo kutoka Benki ya Exim ya China huku asilimia 5 ikitoka serikalini. Akizungumzia faida za miundombinu hiyo, Dk Mataragio alitaja faida kadhaa za gesi hiyo, ikiwemo itatumika kuzalisha umeme, jambo litakaloifanya Tanzania kuwa na umeme wa uhakika.
Alitaja faida nyingine kuwa ni pamoja na kuongeza Pato la Taifa, kutokana na uuzaji wa gesi hiyo nje ya nchi kuokoa fedha za kigeni, ambazo hutumika kuagizia mafuta kutoka nje ya nchi. Nyingine ni kukuza uchumi kupitia ukuaji wa sekta ya viwanda, kuongeza mapato ya halmashauri kupitia mirabaha na kuchochea utafiti wa mafuta na gesi.
Alisema miundombinu hiyo, itakuwa na uwezo wa kusukuma gesi yenye futi za ujazo milioni 784 kwa siku ifikapo mwaka 2020, kutoka uwezo wa sasa wa kusukuma futi za ujazo milioni 80 pekee.
Akimkaribisha Rais Kikwete, Waziri wa Nishati na Madini, George Simbachawene alisema kuwa huo ni utekelezaji wa Ilani ya CCM, na kwamba Serikali ina mpango wa kujenga mitambo ya umeme mkoani Mtwara, itakayozalisha zaidi ya megawati 600 kwa ajili ya mikoa ya Kusini ya Lindi na Mtwara.
“Mheshimiwa Rais tunakupongeza sana kwa jitihada zako, kuna watu wanabeza na wanahoji eti utatuachaje, mimi nawaambia kwamba ulipoingia ulitukuta na gesi ya futi za ujazo trilioni 8, lakini unatuacha na futi za ujazo trilioni 52,” alisema. Simbachawene alisema kuwa ujenzi wa miundombinu hiyo, utazalisha ajira zaidi ya 1,363 katika eneo hilo la Mtwara.

created by Gazeti la HabariLeo