Stars yaipania Algeria

Wachezaji wa timu ya taifa ya Tanzania, Taifa Stars, pamoja na kocha wao mkuu, Charles Mkwasa (kushoto mbele), wakitoka katika ndege baada ya kuwasili kwenye Uwanja wa Ndege wa Julius Nyerere Dar es Salaam jana.
KOCHA Msaidizi wa Taifa Stars Hemed Morocco amesema baada ya kuvuka hatua ya kwanza ya michuano ya kufuzu Kombe la Dunia, wanajipanga kuimaliza Algeria katika mchezo ujao.
Taifa Stars imefanikiwa kuvuka hatua nyingine baada ya kuifunga Malawi kwa juma ya mabao 2-1, wakifunga mabao 2-0 nyumbani na kufungwa bao 1-0 ugenini. Akizungumza juzi baada ya mchezo dhidi ya Malawi uliochezwa kwenye uwanja wa Kamuzu Banda jijini Blantyre Malawi, Morocco alisema wanashukuru kwa kufanikiwa kuitoa Malawi, kwani wanarudi kujipanga tena kwa ajili ya kuwamaliza Algeria.
Alisema licha ya kuwa Algeria ni timu bora Afrika, ikiwa watajipanga wanaweza kufanya vizuri na kuwapindua. “Tunashukuru kuvuka hatua moja bado tuna kazi ngumu na kubwa mbele yetu kuhakikisha tunaendeleza ushindi katika mchezo ujao na kutengeneza historia mpya katika soka letu,” alisema.
Hatua hiyo imeifanya Stars kutengeneza historia mpya ya kuifunga Malawi, kwani kwa kipindi cha karibu mwaka mzima walichokuwa wakikutana katika michezo ya kirafiki walikuwa wakitoka sare, ambayo kama siyo ya kufungana basi ya kutokufungana.
Ushindi huo ni mwanzo mzuri wa Kocha Mkuu Charles Mkwasa na benchi lake la ufundi ikiwa ni siku chache tangu kukabidhiwa mkataba wa kudumu wa kuinoa timu ya Taifa. Kulingana na viwango vya Shirikisho la Soka Duniani (FIFA) Tanzania inashika nafasi ya 136 wakati timu waliyoitoa inashika nafasi ya 101 na timu wanayotarajia kukutana nayo ya Algeria ikishika nafasi ya 19 kwa ubora duniani huku ikiwa ya kwanza Afrika.
Taifa Stars ilitarajiwa kuwasili jana ikitokea Malawi huku wachezaji walioko katika kikosi hicho wakisubiriwa na timu zao kujiandaa na michuano ya Ligi Kuu Tanzania Bara itakayoendelea mwishoni mwa wiki ijayo.

Created by Gazeti la HabariLeo.