JKT Ruvu sawa na sikio la kufa

Kikosi cha JKT Ruvu.

TIMU ya JKT Ruvu msimu huu imeanza vibaya michuano ya Ligi Kuu Tanzania Bara. Imeanza vibaya kwa sababu imecheza michezo sita, imepoteza mitano na sare moja ukilinganisha na misimu mingine mambo ni tofauti kabisa.
Ukiangalia msimu uliopita, ni miongoni mwa timu za Jeshi ambazo zilionesha mwelekeo kwa kufanya vizuri katika michezo yake ya awali na hadi msimu unakwisha ni JKT Ruvu. Kocha Minziro Pia, katika historia ya Kocha wa JKT Ruvu, Fred Minziro na timu hiyo hawajahi kufanya vibaya kiasi hicho, jambo ambalo hata yeye mwenyewe ni kama ameshtuka na kutaka kujivua kuendelea kuifundisha timu hiyo.
Timu hii ya JKT Ruvu msimu uliopita ilionesha upinzani wa hali ya juu kwa maana kwamba, iliwahi kukimbizana na Mtibwa Sugar kwa kuongoza ligi kwani ilikuwa ikijitahidi kufunga katika mechi za ugenini na nyumbani wakati huo wakiwa wanatumia uwanja wa Azam Complex, Chamazi. Tangu Minziro alijiunge na timu hiyo miaka kadhaa iliyopita, alipata mafanikio lakini inashangaza msimu huu hali imekuwa tofauti kabisa, ambapo hadi sasa inashika mkia katika msimamo wa ligi hiyo inayoshirikisha timu 16.
Kufungwa sana Ukilinganisha na timu nyingine, hii imefungwa mabao mengi wakati ndio kwanza wamecheza mechi sita hadi sasa huku ikishikilia mkia ikiwa na pointi moja moja iliyoipata katika sare. Kiujumla timu hiyo haijawahi kushinda mchezo wowote hadi sasa na imeshafungwa mechi tano na kutoka sare mara moja tu. Katika mchezo wao wa hivi karibuni dhidi ya Toto Africans uliochezwa Mwanza, JKT Ruvu ilifungwa bao 1-0.
Aidha, pointi moja waliyonayo ilitoka katika mchezo dhidi ya Kagera Sugar ambapo walitoka sare ya bila kufungana katika mchezo uliopigwa Tabora. Walicheza na Stand United katika uwanja wao wa nyumbani msimu huu wa Karume wakafungwa bao 1-0. Wakafungwa na Yanga mabao 4-0, wakafungwa na Mbeya City mabao 3-0, wakafungwa na Majimaji 1-0 huko Songea. Ndio timu pekee ambayo inaongoza kwa kufungwa mabao 10 huku ikiwa haijafunga hata bao moja.
Timu nyingine inayofuatia ni Coastal Union yenye pointi tatu inayohitaji kubadilika ili kufanya vizuri. Coastal nayo imekuwa tofauti msimu huu kwa kupoteza michezo ya nyumbani na ugenini. Kama timu hizo hazitabadilika huko zinakokwenda hali itakuwa mbaya kwao kwani kila timu inajitahidi kuhakikisha inajiweka kwenye mazingira mazuri. Usajili wake Kama ni usajili mzuri timu hii imejitahidi kwa kusajili wachezaji wanaofahamika na wenye uwezo mkubwa kiasi fulani.
Katika kujiimarisha ilimsaili Gaudence Mwaikimba ambaye alitemwa Azam baada ya mkataba wake kuisha, ilimsajili mchezaji matata wa JKU Zanzibar, Omar Janja ambaye alifanya vizuri kwenye michuano ya Kombe la Mapinduzi msimu uliopita. Maandalizi awali JKT Ruvu ilifanya maandalizi mazuri kabla ya kuanza kwa msimu mpya huku wakisafiri mikoa tofauti na kucheza mechi za kirafiki.
Kwa hakika mechi ambazo walikuwa wakicheza ziliwapa mwanga kwamba watakuwaje katika kukabiliana na upinzani wa Ligi Kuu Tanzania Bara. Changamoto kubwa katika maandalizi yao ni kubaki wachezaji wengi raia wakikaa kwa pamoja katika michezo hiyo huku wengine ambao ni wanajeshi wakiwa katika kundi lingine linalojiandaa na michuano ya Majeshi iliyofanyika Uganda.
Kikosi cha JKT Ruvu chenye wachezaji mchanganyiko wa wanajeshi na raia hakika huwa kinakuwa kwenye mazingira magumu kama hayo hasa wengine wanapoondoka kwenda mashindano ya Majeshi, wengine wanapokwenda kwenye kozi za Kijeshi. Watawezaje kucheza soka la ushindani kama kuna mgawanyiko huo ndani ya timu moja ambayo inasaka nafasi ya kuchukua taji la ubingwa wa Ligi Kuu Tanzania Bara kama ilivyo kwa timu nyingine.
Ni wazi kuwa uongozi wa timu hiyo unahitaji kuwa na jicho la pili kama kweli wanataka timu yao kufanya vizuri, la sivyo itabaki kuwa mshiriki tu na mwisho wa siku wanashuka daraja. Kauli ya Minziro Kocha Fred Minziro anasema anapenda timu ifanye vizuri, lakini kuna changamoto nyingine ziko nje ya uwezo wake anashindwa kusema lakini zinachangia kwa kiasi kikubwa timu kushindwa kufanya vizuri. Anasema kitu kinachomshangaza zaidi ni timu yake kufanya mambo tofauti.
Inapokuwa kwenye mazoezi hufanya vizuri kama inavyoelekezwa, lakini wanapoingia uwanjani mambo huwa tofauti kabisa. “Sijui kinachotokea ni kitu gani, lakini nimekuwa nikijitahidi kuwasisitiza wachezaji wangu kufanya yale ninayowaelekeza lakini wanapoingia uwanjani hucheza wanavyojua wao,” anasema. Minziro anasema kwa matokeo hayo hata yeye mwenyewe hakuridhika na yuko tayari kuwajibika kama itahitajika hivyo.
Anasema kuliko kuendelea kufundisha timu na kupata matokeo mabaya ni afadhali kuachia ngazi kwani hapendi matokeo mabovu. Baada ya mchezo dhidi ya Stand United uliochezwa kwenye uwanja wa Karume na kufungwa bao 1-0, kocha huyo alitaka kujivua kibarua chake. Kocha huyo alikataa kusafiri na timu kwenda Tabora na kumuachia Kocha wake Msaidizi Greyson Haule.
Licha ya Minziro kutaka kuachia ngazi, Ofisa Mteule Daraja la Pili Constatine Masanja anasema kuwa bado suala lake linafanyiwa kazi na sio kweli kama amechia ngazi. Anasema anaendelea kufanya mazungumzo na uongozi wa timu hiyo na kama itashindikana itawekwa wazi wakati wowote. “Minziro bado ni kocha wetu na ana mkataba wa kuifundisha JKT Ruvu, bado hajaachia ngazi kama baadhi ya vyombo vya habari vilivyotangaza, kama kuna lolote litatokea tutawaeleza,” anasema
Hata hivyo, hakuna sababu yoyote ya wao kukata tamaa isipokuwa waangalie ni wapi wamekosea kwani bado ndio kwanza ligi imeanza na hiyo ni michezo michache kama watajirekebisha mapema wanaweza kubadilisha matokeo. Uongozi wa timu uzungumze na kocha na pengine wachezaji watagundua matatizo yaliyojificha ambayo wengine hawayafahamu.
Kama kweli wamedhamiria kucheza michuano ya Ligi Kuu sio tu katika kujiburudisha bali pia, soka ni biashara na kwa jinsi ambavyo watapigana na kuendelea kubaki watanufaika. Ikiwa wataruhusu timu hiyo kushuka daraja itajiweka kwenye mazingira magumu ya kupambana ili kupanda tena. Mapungufu yao yanahitajika kurekebishwa kuanzia sasa na kurudisha Ruvu mpya ya wakati ule.
Kufanya marekebisho kuanzia sasa inawezekana kuibadilisha timu hiyo na kurudisha kiwango chake, lakini kama itaendelea kufanya vibaya, basi itakuwa sawa na sikio la kufa ambalo alisikia dawa.

Created by Gazeti la HabariLeo