Mkapa ataka mabadiliko UN

Mratibu wa mashirika ya umoja wa mataifana mwakilishi mkazi wa shirikala maendeleo (UNDP) Alvaro Rodriguez akimkabidhi Rais mstaafu, Benjamin Mkapa tuzo ya Umoja wa Mataifa kwa kutambua mchango wake katika Malengo ya Milenia (MDGs). Anayeshuhudia ni Waziri wa Mambo ya Nje na Ushirikiano wa Kimataifa, Benard Membe. Hafla hiyo ilifanyika Dar es saalam jana kitika ukumbi wa mkutano wa mwalim Julius Kambarage Nyerere

RAIS mstaafu wa Awamu ya Tatu, Benjamin Mkapa ametoa wito wa kufanyika kwa mabadiliko katika mfumo wa uendeshaji wa Umoja wa Mataifa ili kukidhi mahitaji ya sasa ya dunia.
Mkapa alisema hayo jana katika mdahalo kwenye juma la Umoja wa Mataifa ambalo linamalizika leo, katika maadhimisho ya miaka 70 tangu kuundwa kwa umoja huo. Mdahalo huo umefanyika katika Ukumbi wa Kimataifa wa Mwalimu Nyerere jana.
Mkapa ambaye alichukua muda wake mwingi kuelezea na kuangalia maslahi ya Umoja wa Mataifa kwa dunia na changamoto inazokabiliana nazo, alisema kwa muda sasa dunia inataka mabadiliko katika uendeshaji wa Umoja huo lakini wanaonufaika na mfumo wa sasa wamekuwa wagumu kukubali mabadiliko.
Alisema kuna mambo sasa yanatokea yanayohatarisha usalama wa mataifa, lakini hatua zinazopendekezwa zinashindwa kuchukuliwa kutokana na kuendelea kuwapo kwa tabia ya vita baridi kati ya mataifa makubwa yenye kura ya veto katika umoja huo.
Hata hivyo, Mkapa alisema kwamba masuala ya usalama wa dunia ni nyeti sana kubaki katika mikono ya watu wachache na kutaka uwezo huo kupewa dunia kwa kuiwekeza katika sheria ya kimataifa inayotaka uwajibikaji wa pamoja katika masuala ya usalama.
Aidha alipongeza umoja huo katika miaka 70 Umoja huo umefanikiwa kutokomeza ubaguzi wa rangi barani Afrika, kukabiliana na maradhi na kupambana kutengeneza amani na kuzuia vita duniani.
Awali akimkaribisha Rais mstaafu kuzungumza, Waziri wa Mambo ya Nje na Ushirikiano wa Kimataifa Bernard Membe alisema wakati umefika kwa vijana kujua mustakabali wa dunia na maendeleo yake.
Alisema vijana ambao kwa sasa ndio wengi wanapaswa kushirikishwa katika kubuni na kutekeleza mikakati ya kimaendeleo. Naye Mratibu wa Mashirika ya Umoja wa Mataifa nchini Alvaro Rodriguez pamoja na kumshukuru Rais mstaafu kwa kukubali kuzungumza na vijana katika maadhimisho ya miaka 70 ya Umoja huo amesema hoja alizotoa rais huyo wa zamani ni za msingi na zinazostahili kuangaliwa.
Alisema amefurahishwa na jinsi kiongozi huyo wa zamani alivyouzungumzia Umoja wa Mataifa kwa kuangalia mwanzo wake na maazimio ya awali ya kwanini umoja huo ni muhimu hasa katika suala la amani na usalama duniani.
Aidha alisema mabadiliko aliyokuwa akizungumzia Rais Mkapa ya Umoja huo ambayo yanatakiwa kuzingatia usalama wa dunia yatawezekana kutokana na jinsi nchi zinavyowajibika.
Created by Gazeti la HabariLeo.