MGOMBEA urais kupitia CCM, Dk John Magufuli, ameanza kupangia kazi Sh bilioni 992 zilizotolewa na Shirika la Changamoto za Milenia (MCC) la Marekani, kwa ajili ya kusambaza umeme nchini.
Akizungumza jana katika maeneo mbalimbali ya wilaya ya Bagamoyo, alikowasili kuomba kura kwa wananchi, Dk Magufuli alisema kazi ya usambazaji umeme itakayofanyika kwa kutumia fedha hizo na nyingine za ndani, itaharakisha malengo ya kugeuza nchi, ikiwemo wilaya hiyo kuwa ya viwanda vikubwa, vya kati na vidogo.
Katika hatua nyingine, mgombea huyo wa CCM, aliwaambia wakazi wa Bagamoyo kuwa miaka 10 ya uongozi wa Rais Jakaya Kikwete, Tanzania imepiga hatua kubwa katika miradi ya maendeleo na kujijengea heshima kubwa katika jumuiya ya kimataifa.
Kugundulika kwa gesi
Akizungumzia ugunduzi wa gesi katika wilaya hiyo ambayo ndiyo anayotoka Rais Kikwete, Dk Magufuli alisema fursa hiyo imemuongezea dhamira ya kuifanya Bagamoyo kuwa eneo la viwanda vikubwa, vya kati na vidogo ili kusukuma azma ya kuifanya Serikali ya Awamu ya Tano kuwa ya viwanda.
“Tutatumia gesi hiyo kwa uzalishaji viwandani. Ndani ya miaka michache ijayo, wananchi wa Bagamoyo watashuhudia uzalishaji mkubwa wa biadhaa za viwandani, zitakazouzwa ndani na nje ya nchi,” alisema Dk Magufuli.
Katika kile kilichodhihirisha utashi wa kisiasa kwa Dk Magufuli kuifanya serikali yake kuwa ya viwanda, alisema mbali ya umeme wa gesi, atatumia sehemu ya Sh bilioni 992 za MCC ili kusambaza umeme katika maeneo mbalimbali nchini, ikiwemo maeneo yote ya jimbo hilo ili kukuza uchumi na kuvutia uwekezaji.
Shirika la MCC lilimhakikishia Rais Kikwete alipokuwa akihudhuria vikao vya Umoja wa Mataifa nchini Marekani hivi karibuni, kuwa Tanzania imekidhi viwango vya kupata kiasi hicho cha fedha baada ya kuridhika na hatua za kukabiliana na rushwa, kigezo pekee kilichokuwa kimesalia kwa Tanzania kufuzu vigezo vyote.
Pongezi kwa Kikwete
Kuhusu miaka 10 ya uongozi wa Rais Kikwete, Dk Magufuli aliwaambia wakazi wa Mbweni katika Jimbo la Chalinze na baadaye wakazi wa Bagamoyo Mjini, kwamba Rais Kikwete amewezesha kukua kwa maendeleo na kuipa sifa Tanzania katika jumuiya ya kimataifa.
“Naomba niwahakikishie kwamba nitaendeleza jitihada hizi za Rais Kikwete katika kuwaletea wananchi maendeleo kwa kasi kubwa kadri itakavyowezekana,” alisema.
Alizungumzia pia ujenzi wa barabara za lami huku akiahidi kujenga barabara ya Makulunge kupitia Hifadhi ya Saadan hadi Tanga, ili kufungua njia nyingine kuu ya mawasiliano baina ya Mkoa wa Pwani na Mkoa wa Tanga, yenye urefu wa kilometa 173.8, hatua ambayo pia itaharakisha maendeleo ya wananchi.
Alisema katika kipindi cha miaka mitano ijayo, endapo atachaguliwa kuwa Rais, atashughulikia matatizo ya maji katika mji wa Bagamoyo ili kuufanya mji huo kuendelea kuwa kitovu cha utalii na kuvutia uwekezaji kuliko ilivyo sasa.
Kuhusu fidia kwa wakazi wa wilaya hiyo, waliochukuliwa maeneo yao ili kupisha viwanda kupitia Ukanda Maalum wa Uwekezaji wa Viwanda (EPZ), Dk Magufuli alisema tathimini imeshaanza ili kuhakikisha wananchi hao wanalipwa fidia zao ili waendelee na mipango yao ya maisha.
“Haiwezekani Bagamoyo kuwe na uhaba wa maji wakati mji unazungukwa na bahari. Nitakapoingia madarakani hilo halitakuwa tatizo tena, na kama mnavyonifahamu mimi si mtu wa maneno ni mtu wa vitendo, suala la maji naomba mniachie mimi,” alisema.
Kama alivyoahidi katika maeneo mengine nchini, Dk Magufuli aliahidi Serikali yake kuanza kutoa Sh milioni 50 za mikopo kwa wanawake na vijana kwa kila kijiji na kata kuanzia mwaka ujao, na pia kuanza kutoa posho kwa wazee wastaafu, ambao wanakisiwa kufikia asilimia 2 ya idadi ya watu nchini.
Aliahidi pia kupanua daraja la Wami ili kupunguza ajali katika eneo hilo na pia kutoa majengo ya kambi ya ujenzi wa barabara ya Bagamoyo kwenda Msata, yatumike kwa matumizi mengine baada ya mradi kumalizika.
Created by Gazeti la HabariLeo
0 comments:
Post a Comment