MGOMBEA Ubunge wa Jimbo la Kigoma Mjini kwa tiketi ya Chama cha ACT Wazalendo, Zitto Kabwe, anawaomba wananchi wa jimbo hilo kupiga kura kwa wingi ili aweze kupata nafasi ya kuimarisha uchumi wa mkoa wa Kigoma.
Zitto ambaye amekuwa Kigoma Kaskazini kwa tiketi ya Chama cha Demokrasia na Maendeleo (Chadema) kwa miaka 10 mfululizo anasema ana mipango mingi ya kuleta maendeleo lakini hawezi kuitekeleza pasipokuwa na mamlaka. Anasema Kigoma ni mkoa wenye rasilimali nyingi ambazo zikitumika ipasavyo zitawawezesha wananchi kuendelea kiuchumi na kijamii kwa kuwa ina fursa ya kufanya biashara na nchi jirani za Burundi, Kongo na Zambia.
Zitto ambaye ni kiongozi mkuu wa chama hicho, anawaomba wananchi wa mkoa wa Kigoma na hasa jimbo la Kigoma mjini kumpa ridhaa ya kuongoza jimbo hilo kwa kipindi kimoja tu yaani miaka mitano na atakaposhindwa kuleta mabadiliko aliyoyaahidi ahukumiwe. Anajigamba kwamba yeye ni mbunge mjanja, anayetazama mbali na pia mwenye mtandao mpana hivyo wananchi wamchague kwasababu anajua kila kona ya kupita kuhakikisha jimbo la Kigoma Mjini linakuwa kitovu cha biashara.
“Tunahitaji mazingira mazuri ya kibiashara katika mkoa wetu wa Kigoma, umaarufu wa mkoa huu ni mkubwa kwa sababu tuko mpakani na hii kwetu ni fursa, sasa nawaambia mmepata mbunge mjanja, anaetazama mbali, mwenye mtandao mpana kuweza kutanua mawazo yenu,” anasema Zitto.
Anasema tatizo kubwa la mkoa wa Kigoma ni ukosefu wa viwanda ambavyo vitawawezesha wananchi kutengeneza rasilimali walizonazo kuzifanya kuwa bidhaa zinazouzika na pia kutengeneza ajira kwa wananchi na hasa kwa upande wa zao la michikichi na pia uvuvi wa samaki wanaopatikana katika ziwa Tanganyika.
Kwa upande wa zao la mchikichi, kwanza linazalisha mafuta ya mawese, ambayo yanatumika kwa kupikia chakula na pia kupaka, zao hilo pia linazalisha chakula cha mifugo. Anasema hata hivyo kabla ya kupatikana viwanda ni muhimu kwanza kutatua changamoto ya umeme ili uweze kupatikana umeme wa uhakika na wa gharama nafuu ambao utawawezesha wananchi wa mkoa huo kufanya biashara zao kirahisi.
“Lazima mradi wa mto Malagalasi ukamilike na tayari mpaka sasa mimi binafsi kuna jitihada ambazo naendelea nazo nasubiri tu mnipe ridhaa ya kuwa mbunge wenu ili niwe na nguvu niweze kusaini mkataba waweze kuanza kujenga,” anasema Zitto katika mikutano yake ya hadhara Kigoma mjini. Zitto anasema kwa sasa anashindwa kusaini na kuanzisha mradi wowote kwa sababu ataulizwa anataka mradi huo yeye kama nani ingawa amekwisha kamilisha upembuzi yakinifu katika mradi huo.
Anasema mkoa wa Kigoma unahitaji wabunge wenye umoja, ujasiri, na umahiri ili kuweza kusukuma kwa kasi miradi ya maendeleo ili kuufanya mkoa huo ufike mbali kimaendeleo kama mkoa kuufanya kupewa hadhi ya jiji. Zitto anasema ameweza katika jimbo alilotoka kufanikisha upatikanaji wa bandari ya Kagunga na ujenzi wa soko la kisasa katika mji wa Kagunga.
Zitto anasema katika malengo ambayo yanaenda kutekelezwa kwa mkoa wa Kigoma na chama chake, na suala la umeme wa mto Malagarasi limo. “Katika kuhakikisha wananchi wanaweza kufanya biashara yenye uhakika, ni muhimu kuhakikisha mradi wa umeme wa mto Malagarasi unakamilika ili kuondoa tatizo la umeme katika mkoa wa Kigoma,” Zitto anasema.
Zitto anayataja mambo mengine ambayo yeye na chama chake wamepanga kuyafanya kwa mkoa wa Kigoma kuwa ni pamoja na kushawishi uanzishwaji wa benki ya wananchi wa Kigoma ili kuwezesha wafanyabiashara na wananchi kuwa na chanzo cha mikopo kupanua biashara zao na kuongeza ajira kwa wakazi wa mkoa huo. Endapo atachaguliwa kuwa mbunge, Zitto atashawishi uanzishwaji wa chuo kikuu cha Kigoma (The University of Kigoma) ili kupanua elimu ya juu na kuchochea ukuaji wa uchumi wa mkoa.
Pia atahakikisha vyuo vya ufundi vinaanzishwa kila halmashauri. “Pia tumejipanga mimi na wenzangu kuwezesha vikundi vya wananchi ikiwemo wakulima, wafugaji, wafanyabiashara ndogondogo kuwa na hifadhi ya jamii na hivyo kufaidika na mafao kama mikopo ya riba nafuu na bima ya afya,” anasema Zitto. Zitto anasema kwa kutumia fedha za mfuko wa jimbo wataweza kuwapatia wananchi fedha ambazo zitaingia katika fedha walizojiwekea kupitia vikundi vyao ili wawe na sehemu ya kukopa kwa riba nafuu kuendeleza biashara zao.
“Hii inawafanya wananchi wenyewe kuchangia katika maendeleo yao wenyewe, tutakachokifanya ni kupitia vikundi vyao watajiwekea fedha na mimi kama kikundi kimejiwekea milioni mbili, basi na mimi nawaongezea milioni mbili, nitafanya hivyo hivyo kwa vikundi vingine,” anasema Zitto. Akichaguliwa kuwa mbunge Zitto atachochea kuanzishwa kwa viwanda vya sukari na saruji ili kukuza ajira kwa wingi katika mkoa huo na kuunda umoja wa wabunge watetezi wa maendeleo ya reli ya kati inaimarishwa.
Kuhamasisha na kusimamia uendelezaji wa bandari za Kigoma ili kuimarisha mkoa huo kuwa kitovu cha biashara ukanda wa maziwa makuu, kuhamasisha utalii ili kuzalisha ajira kwa wingi kwa wananchi wake, kupambana dhidi ya rushwa na ufisadi katika halmashauri za mkoa ili kuhakikisha huduma za jamii kama maji, afya na elimu zinaimarika.
Anasema chama hicho kinaamini katika misingi ua Ujamaa wa Kidemokrasia ikiwa na ngao nne ambazo ni undugu ni hifadhi ya jamii ya asili kwa waafrika kila mtanzania na mwafrika anawajibu wa kumsaidia mwenzake anayekabiliwa na tatizo bila kutarajia malipo yoyote.
Ngao nyingine ni kusimamia maendeleo ya nchi kwa kuwa ni haki na wajibu wa kuendesha sekta nyeti katika jamii zenye maslahi mapana ya kiusalama na kiuchumi bila kuathiri sekta binafsi.
Anasema ACT Wazalendo ina falsafa ya Nyerere ikiwa na dhamira ya kurudisha misingi iliyoasisi taifa kama inavyoelezwa katika Azimio la Arusha kuwa binadamu wote ni sawa, kila mtu anastahili heshima kila mtu anastahili uhuru kamili wa kutoa mawazo yake kwenda anakotaka na dini aitakayo bila kuvunja sheria Mbali na Zitto, ACT Wazalendo imeweza kusimamisha wagombea ubunge katika majimbo mbalimbali mkoani Kigoma ikiwa ni pamoja Leopold Huhagaze (Buyungu), Edga Francis (Muhambwe), Moses Machali (Kasulu Mjini) ambaye alikuwa mbunge wa jimbo hilo kwa tiketi ya NCCR Mageuzi.
Created by Gazeti la HabariLeo
0 comments:
Post a Comment