RAIS mstaafu wa Awamu ya Tatu, Benjamin Mkapa ametaka umma wa Watanzania kutambua aina ya rais anayetakiwa kwa kusema, hachaguliwi rais wa klabu ya mpira, bendi ya muziki au chama cha ushirika, bali wanatakiwa kuchagua amiri jeshi mkuu aliye mwadilifu.
Mkapa, ambaye alimtaja Dk John Magufuli kuwa ndiye rais anayestahili kuwa amiri jeshi mkuu kutokana na uadilifu wake, alisema hayo jana kwenye mkutano wa kampeni za CCM uliofanyika kwenye viwanja vya Boma mjini Masasi.
Alifafanua kwamba, kati ya wagombea wote 38 wa CCM hicho ambao walifanikiwa kurejesha fomu za kuomba kuteuliwa kugombea urais, Magufuli ndiye alikidhi vigezo vilivyowekwa.
“Ndugu zangu wana Masasi… kwa kuwa hatuchagui rais wa klabu ya mpira, hatuchagui rais wa chama cha ushirika na hatuchagui rais wa bendi ya muziki, bali tunachagua rais ambaye atakuwa amiri jeshi mkuu wa majeshi, muadilifu na huyo ni Dk John Magufuli,”alisema na kuongeza: “Naomba sana msiniangushe… kumbukeni nchi yetu iko kwenye kipindi kigumu cha uchaguzi hivyo nawaomba msifanye makosa.”
Alisema Magufuli ambaye ni mgombea urais wa CCM, ni kiongozi anayejua shida za Watanzania, mchapakazi, mfuatiliaji na mwenye uchungu na watanzania. Rais huyo mstaafu alieleza namna mchakato wa kumpata mgombea wa CCM ulivyofanyika na kusema, ulikuwa halali na ulihusisha viongozi wa baraza la wazee la chama hicho kinyume na inavyoelezwa na baadhi ya wanachama waliokihama.
Alisema watanzania wasidanganywe na viongozi waliohama CCM kwa madai kuwa hawakutendewa haki. Alisema CCM kinafuata kanuni zilizowekwa zenye lengo la kuwapata wagombea wake wa nafasi mbalimbali ikiwemo nafasi ya urais.
Alisema hata wakati wa mchakato wa kumpata yeye kuwa mgombea wa urais mwaka 1995 hakuwa peke yake lakini wagombea wenzake wa nafasi hiyo waliposhindwa hawakuhama.
Created by Gazeti la habariLeo.
0 comments:
Post a Comment