SERIKALI imepokea majina matatu ya mahujaji wengine wa Tanzania, waliokufa kutokana na tukio la kukanyagana lililotokea eneo la Mina, katika mji Mtakatifu wa Makka, Saudia Arabia Septemba 24, mwaka huu, hivyo kufanya idadi ya mahujaji wa Tanzania waliopoteza maisha nchini humo kufikia 11.
Hayo yalithibitishwa jana na Serikali kupitia taarifa ya Wizara ya Mambo ya Nje na Ushirikiano wa Kimataifa iliyotolewa kwa vyombo vya habari. Taarifa hiyo iliwataja watatu zaidi waliokufa kuwa ni Yusuf Ismail Yusuf kutoka kikundi cha Khidmat Islamiya, Rahma Salim Suweid kutoka kikundi cha Ahlu Daawa na Issa Amir Faki.
Ilisema mahujaji hao walitambuliwa baada ya kupitia taarifa zao za vidole zilizotolewa na Serikali ya Saudi Arabia. Serikali ilisema vifo hivyo vinaendelea kuwa pigo kwa taifa na kwamba, vimepokelewa kwa masikitiko makubwa.
“Aidha, Ubalozi unaendelea kushughulikia taratibu za maziko kwa mahujaji ambao wamefariki dunia na miili yao kutambuliwa. Tunapenda kufafanua kuwa mali za marehemu ikiwemo mizigo waliyokuwa nayo wakati wa Hijah zitawasilishwa nyumbani Tanzania na vikundi walivyokuja navyo na kukabidhiwa kwa jamaa wa marehemu,” ilieleza wizara.
Pia ilieleza kuwa Ubalozi unaendelea kufuatilia orodha mpya ya taarifa za vidole, iliyotolewa na Serikali ya Saudi Arabia kwa ajili ya kuwabaini mahujaji wa Tanzania ambao hawajatambuliwa. Mpaka sasa zaidi ya mahujaji 30 wa Tanzania hawajulikani walipo.
Created by Gazeti la HabariLeo
0 comments:
Post a Comment