MBIO za nne za Dar Rotary zitafanyika Jumatano Oktoba 14 siku ya Kumbukumbu ya Mwalimu Nyerere. Mbio hizo ambazo hufanyika kila mwaka zikiwa na lengo la kuchangisha fedha kwa ajili ya kuhudumia jamii, zimekuwa zikiongezeka umaarufu wake, ikiwemo kuwashirikisha wanariadha wengi zaidi.
Pia mbio hizo sasa zimekuwa zikiwashirikisha wanariadha wa ndani na nje ya nchi, huku zawadi zake zikiboreshwa kila mwaka na kuwa kivutio kikubwa kwa washiriki. Waandaaji wa mbio Mbio hizo zimekuwa zikiandaliwa na Dar Rotary kwa kushirikiana na Bank M kwa kusaidiwa na wadhamini mbalimbali, mbali na wanariadha pia hushirikisha familia kwa ajili ya mbio tofauti tofauti.
Baadhi ya mbio ambazo hushindaniwa ni pamoja na mbio za kilometa 21, mbio za baiskeli, mbio za kilometa 9 na zile za kutembea ambazo zina umbali wa kilometa 5. Waandaaji wa mbio hizo wamekuwa wakishirikiana na Riadha Tanzania (RT) kufanikisha mbio hizo zenye lengo la kukusanya fedha kwa ajili ya kutatua matatizo mbalimbali ya jamii. Ujumbe wenyewe Ujumbe wa mwaka huu ni Okoa Maisha, ambapo waandaaji wanakusanya fedha kwa ajili ya kujenga hospitali ya kutibu magonjwa ya moyo.
Kwa muda mrefu wagonjwa wa moyo nchini kwetu wamekuwa wakipelekwa nchini India kupata matibabu hayo ya moyo, ambayo ni ghali sana na kuwafanya wagonjwa wengi kushindwa kwenda kutibiwa nje. Ushindani wenyewe Mbio za mwaka huu zinatarajia kuwa na ushindani mkubwa zaidi na tayari baadhi ya wanariadha kutoka nje ya nchi wameshathibitisha kushiriki mbio hizo za aina yake.
Kwa mujibu wa Kaimu Katibu Mkuu wa RT, Ombeni Zavalla, baadhi ya wanariadha wa Kenya, Rwanda na Malawi wamethibitisha kushiriki mmbio hizo. Zavalla aliwataja baadhi ya wanariadha hao kuwa ni pamoja na wale wanaotoka Rwanda, Malawi, Kenya, Ethiopia na Afrika Kusini wameshathibitisha kushiriki katika mbio za mwaka. Hakuna asiyejua kuwa wanariadha wa Kenya, Ethiopia na hata wale wa Rwanda ni wazuri, hivyo mwaka huu tunatarajia ushindani wa aina yake katika mbio za mwaka huu.
Kwa mujibu wa Zavalla, Rwanda imethibitisha kuleta wanariadha wanne, ambao ni Robert Kajuga, Potien Ntawoyirushintege, Salome Nyirarunkundo na Innocent Uwamohoro wakati Afrika Kusini ikimleta Vuyisile Tshoba.
Malawi inatarajia kuwaleta Happy Ndacha, Mcherenje, Francis Khanje,Rashid Taimu, Godfrey Mpunga, Doris Fisho na Tereza Master wakati Zanzibar wakitarajiwa kuwaleta Philipo Jacob Mambo, Abdallah Jecha Abdallah na Asma Rajabu Mukhandi. Kenya imesema itawaleta Tom Mutie, Patrick Mwika, Mwendwa Ngeti, Shelmith Muriuki, Josephine Masau na Hellen Nzemba wakiwa na kocha Paul Mutwii na Ethiopia ikithibitisha kuleta wanariadha watatu.
Kwa sasa wanariadha wa Tanzania wako katika maandalizi makali kabla ya kushiriki mbio hizo ambazo hutoa zawadi nono kwa washindi kwa upande wa wanawake na wanaume. Mgeni rasmi Rais mstaafu wa Awamu ya Pili Ali Hassan Mwinyi ndiye atakuwa mgeni rasmi katika mbio za mwaka huu zitakazoanzia na kumalizia kwenye viwanja vya The Green au viwanja vya Farasi Oysterbay jijini Dar es Salaam.
Mwaka jana Mwinyi ndiye pia alikuwa mgeni rasmi ambapo mbali na kuzindua mbio hizo, kutoa zawadi kwa baadhi ya washindi, pia alishiriki matembezi ya kilometa tano. Kwa mujibu wa taarifa, kauli mbiu ya mwaka huu ni ‘Okoa Maisha’ ikiwa na lengo la kuchangisha fedha kwa ajili ya kujenga kituo cha afya, ambacho kitakuwa kinahudumia watu wenye matatizo ya moyo.
Mwaka jana karibu wanariadha 1,000 walishiriki katika mbio hizo, ambazo kila mwaka zimekuwa na msisimko mkubwa. Kwa mujibu wa mwenyekiti wa Kamati ya Maandalizi Sharmila Bhatt, mbio hizo zitafanyika Oktoba 14 jijini Dar es Salaam. Naibu Ofisa Mkuu wa Bank M, Jacqueline Woiso alisema kwa mara nyingine wamekubali kushirikiana na Rotary Clubs jijini Dar es Salaam kwa sababu lengo la mbio hizo ni kusaidia jamii.
“Bank M siku zote iko mstari wa mbele kusaidia jamii. Sera zetu wakati wote ni kufanya kazi pamoja taasisi zigine kusaidia jamii kwa njia tofauti,”aliongeza. Mwinyi pia ni mlezi wa Rotary Dar Marathon.
Created by Gazeti la HabariLeo
0 comments:
Post a Comment