WAKURUGENZI watendaji wawili wa manispaa ya Mpanda mkoani Katavi na ya Kigoma, wamesimamishwa kazi kwa tuhuma za kuridhia na kutekeleza uamuzi ulioisababishia serikali hasara na upotevu wa fedha.
Waziri wa Nchi, Ofisi ya Rais Tawala za Mikoa na Serikali za Mitaa (Tamisemi), George Simbachawene alitoa taarifa ya kusimamishwa kwao kwenye mkutano na waandishi wa habari, jana. Taarifa ya kusimamishwa kwa watendaji hao, ilitolewa na Mkuu wa Kitengo cha Mawasiliano Serikalini Ofisi ya Rais (Tamisemi), Rebecca Kwandu.
Alitaja waliosimamishwa ni Boniface Nyambele wa manispaa ya Kigoma anayekabiliwa na tuhuma za uuzaji wa nyumba za halmashauri bila kufuata sheria, kanuni na taratibu zilizopo, zinazomtaka awe na kibali cha waziri mwenye dhamana.
Mwingine ni Mkurugenzi wa Manispaa ya Mpanda, Suleiman Mkanga anayekabiliwa na tuhuma za ununuzi hewa wa gari la kusomba taka kwa Sh milioni 92.75 na ubadhirifu wa fedha za ujenzi wa skimu ya umwagiliaji ya Kakese, Sh milioni 294.
“Waziri ameagiza nafasi ya Mkurugenzi wa Manispaa ya Kigoma ikaimiwe na Sultan Ndilowa ambaye ni Mkuu wa Idara ya Maji Manispaa ya Kigoma na nafasi ya Mkurugenzi wa manispaa ya Mpanda ikaimiwe na Lauteri Kanoni ambaye ni Katibu Tawala Msaidizi kutoka ofisi ya Mkuu wa Mkoa wa Katavi,” alisema Kwandu.
Pia Waziri Simbachawene aliwataka wakurugenzi watendaji wa mamlaka za serikali za mitaa nchini kuwa makini katika kutekeleza majukumu yao kwa kufuata sheria, kanuni na taratibu zilizopo.
Alisema serikali haitasita kuchukua hatua za kinidhamu kwa watumishi wote, ambao watakiuka matakwa ya sheria, kanuni na taratibu na kutoweka mbele maslahi ya umma.
Created by Gazeti la HabariLeo.
0 comments:
Post a Comment