TUME ya Taifa ya Uchaguzi (NEC), imeamua kuwa viti vitatu vya wabunge wanawake wa Viti Maalumu vilivyobaki uteuzi wake ufanyike mara baada ya kukamilika kwa uchaguzi katika Jimbo la Kijitoupele Zanzibar.
Kikao cha NEC kilichokutana Januari 14 na 15, mwaka huu kilifikia uamuzi huo kwa sababu ya kuahirishwa uchaguzi katika jimbo hilo. Kwa mujibu wa mgawanyo wa viti maalumu uliofanywa na- Tume, kuna jumla ya viti 113 ambavyo ni asilimia 40 ya wabunge wote 281 wa Bunge la Jamhuri ya Muungano wa Tanzania, ambapo Chama Cha Mapinduzi (CCM) kilipata viti 64, Chama cha Demokrasia na Maendeleo (Chadema), viti 36 na Chama cha Wananchi (CUF), viti 10.
Katika mgawanyo huo, vimebaki viti vitatu kukamilisha idadi ya viti 113 ambavyo havikugawanywa kutokana na kutokamilika kwa uchaguzi katika majimbo nane ya Ulanga Mashariki, Arusha Mjini, Handeni Mjini, Ludewa, Masasi Mjini, Lushoto, Lulindi na Kijitoupele.
Uchaguzi umefanyika katika majimbo hayo saba na Jimbo la Kijitoupele kubaki, hali iliyosababisha kikao cha Tume kuamua kuwa uteuzi wa viti hivyo vitatu ufanyike mara baada ya kukamilika kwa uchaguzi katika Jimbo la Kijitoupele.
Kwa mujibu wa Ibara ya 78 (1) ya Katiba ya Jamhuri ya Muungano wa Tanzania, 1977, ili chama cha siasa kilichoshiriki katika Uchaguzi Mkuu kiweze kupata viti maalumu, ni lazima kiwe kimepata angalau asilimia tano ya kura zote halali za wabunge.
Aidha, ili kuweza kukamilisha zoezi hili ni wazi kuwa, uchaguzi ni lazima ukamilike katika majimbo yote. Kwa kuwa uchaguzi haujafanyika katika Jimbo la Kijitoupele, Tume haitaweza kugawa viti vilivyobaki.
Hii inaelewa kuwa ni kutokana na ukweli kwamba endapo uteuzi utafanyika, kura za Kijitoupele hazitatumika katika kupata viti maalumu vilivyobaki, jambo ambalo litakuwa ni kinyume na matakwa ya Katiba. Kwa mantiki hiyo viti hivyo vitatu vitagawanywa mara baada ya uchaguzi kufanyika katika Jimbo la Kijitoupele.
Created by Gazeti la HabariLeo.
0 comments:
Post a Comment