Vituo vya redio vyafungiwa miezi 3

Meneja Uhusiano wa TCRA, Innocent Mungi
MAMLAKA ya Mawasiliano Tanzania (TCRA) imefungia zaidi ya vituo 20 vya redio kwa muda wa miezi mitatu kutokana na sababu mbalimbali ikiwa ni pamoja na kushindwa kulipa ada ya leseni iliyowekwa kwa mujibu wa taratibu zilizowekwa na mamlaka hiyo .
Vile vile mamlaka hiyo imefungia televisheni sita kutokana na sababu hizo na adhabu hiyo imeanza Januari 18, mwaka huu. Tangi Julai, mwaka jana TCRA ilitoa barua kwa zaidi ya watoa huduma 40 ikiwakumbusha kulipia leseni zao.
Meneja Uhusiano wa TCRA, Innocent Mungi, alisema Septemba mwaka jana vituo hivyo vilipewa tena onyo la kutakiwa kulipa ada kabla ya Desemba 31, mwaka jana, lakini hadi Januari mwaka huu ni watoa huduma 11 miongoni mwa vituo vilivyopewa barua ndio vilikuwa vimetimiza masharti ya kile walichotakiwa kufanya.
Meneja huyo alisema Kifungu 22 cha Sheria Mawasiliano ya Eletroniki na Posta cha Mwaka inaipa mamlaka kusimamisha au kufuta leseni kwa mtoa huduma iwapo ameshindwa kulipa ada kama alivyoelekezwa.
Hata hivyo alisema kama mtu yoyote ataamua kulipa ada watamfungulia kwa sababu adhabu inaanza Jumatatu saa sita mchana. Mungi alivitaja baadhi ya vituo vya redio vilivyofungiwa kuwa ni Kiss FM, Radio Free Africa, Sibuka FM, Uhuru FM, Radio Five, Breeze FM, Country FM, Ebony Fm, Generation FM, Kili Fm, Kitulo Fm, Huruma Radio, Rock FM, Standard FM, Top Radio, Ulanga FM, Hot FM, Impact FM, Kifimbo FM na Pride FM.
Vituo vya Televisheni vilivyofungiwa ni Star TV, Sumbawanga Municipal TV, Tanga City TV, Iringa TV, Musa Television Network na Mbeya city TV Akifafanua zaidi alisema baada ya miezi mitatu iwapo watoa huduma hao watashindwa kulipia leseni zao hatua kali zaidi zitachukuliwa dhidi yao.
Hata hivyo, Mungi alikataa kubainisha ni kiasi gani cha ada ya leseni kila mdaiwa anatakiwa kulipa na kusema suala hilo liko kati ya mamlaka na mtua huduma.

Chanzo HabariLeo.