Simba yatakata, Yanga leo

Wachezaji wa Simba kutoka kushoto Hamis Kiiza, Peter Mwalyanzi na Ibrahim Ajib wakishangilia bao pekee jana lililofungwa na Kiiza katika mchezo wa Ligi Kuu Tanzania Bara kati ya timu hiyo na Mtibwa Sugar Uwanja wa Taifa, Dares salaam.

MSHAMBULIAJI Hamis Kiiza jana aliwapa furaha mashabiki wa Simba na kumpa raha Kaimu Kocha Mkuu wa timu hiyo, Jackson Mayanja baada ya kufunga bao pekee katika mchezo wa Ligi Kuu Tanzania Bara dhidi ya Mtibwa Sugar.
Mchezo huo uliofanyika Uwanja wa Taifa, Dar es Salaam umekuja wiki moja baada ya Simba kufungwa pia bao 1-0 na Mtibwa katika mchezo wa Nusu Fainali ya Kombe la Mapinduzi Uwanja wa Amaan, Zanzibar.
Matokeo hayo ya mchezo wa Zanzibar yalileta upepo mbaya Simba ambao ulisababisha Kocha Mkuu wa timu hiyo Dylan Kerr, kuondolewa na majukumu kukabidhiwa Mayanja. Kutokana na ushindi huo Simba imefikisha pointi 30 kwa michezo 14 na kuendelea kujinafasi nafasi ya tatu , nyuma ya mabingwa watetezi, Yanga wenye pointi 32 kwa mechi 13 na vinara, Azam wenye pointi 35.
Azam ilitarajiwa kucheza na African Sports baadaye jana. Yanga yenyewe itashuka uwanjani leo kucheza na Ndanda Uwanja wa Taifa, Dar es Salaam mchezo unaotarajiwa kuwa wa vuta nikuvute.
Kwa kipigo hicho, Mtibwa Sugar imebaki nafasi ya nne ikiwa na pointi 27 baada ya kucheza mechi 14 kama Simba. Katika mchezo wa jana, bao hilo la Simba lilifungwa dakika ya nne na Hamisi Kiiza kwa kichwa akimalizia krosi ya Ibrahim Ajib.
Dakika ya 16 Kiiza akiwa katika nafasi nzuri ya kufunga, alishindwa kulenga lango baada ya shuti lake kupaa juu ya lango. Timu hizo ziliendelea kushambuliana kwa zamu, huku washambuliaji wa timu zote wakishikwa na kigugumizi cha miguu kila walipokaribia eneo la hatari.
Mabadiliko iliyofanya Simba dakika ya 31 kumpumzisha Peter Mwalyanzi na kumuingiza Said Ndemla yalichangamsha kwa kiasi kikubwa sehemu ya kiungo ya timu hiyo. Dakika ya 47, kiungo wa Mtibwa Sugar aliye katika kiwango cha juu kwa sasa, Shiza Kichua nusura aisawazishie bao timu yake, lakini mpira aliopiga ulitoka nje kidogo ya lango.
Kipindi cha pili Mtibwa Sugar walitawala kiasi kikubwa sehemu ya kiungo, lakini umaliziaji ulikuwa butu. Mtibwa watajutia zaidi nafasi ya dakika ya 4 wakati shuti la beki wa kushoto Issa Rashid ‘Baba Ubaya’ lilipogonga mwamba na kuokolewa na mabeki.
Simba; Vincent Angban, Emery Nimubona, Mohammed Hussein ‘Tshabalala’, Hassan Isihaka, Juuko Murshid, Justice Majabvi, Mwinyi Kazimoto, Jonas Mkude, Ibrahim Ajib/Danny Lyanga, Hamisi Kiiza/Awadh Juma na Peter Mwalyanzi/Said Ndemla. Mtibwa Sugar; Said Mohamed, Ally Shomary, Issa Rashid ‘Baba Ubaya’, Salim Mbonde, Henry Joseph, Shaaban Nditi, Shiza Kichuya, Muzamil Yassin, Hussein Javu/Jaffar Kibaya, Ibrahim Rajab ‘Jeba’ na Mohammed Ibrahim/Vincent Barnabas.
Katika michezo mingine iliyofanyika jana, Coastal Union ilifungana bao 1-1 na Coastal Union Uwanja wa Mkwakwani Tanga, wakati JKT Ruvu imefungwa mabao 5-1 na Mgambo Shooting Uwanja wa Karume, Dar es Salaam.
Nayo Toto Africans ililala bao 1-0 kwa Prisons kwenye Uwaja wa CCM Kirumba Mwanza. Katika mchezo mwingine Stand United iliifunga Kagera Sugar 1-0 Uwanja wa Kambarage, Shinyanga huku Mbeya City ikiifunga Mwadui FC bao 1-0.
Wakati huohuo, ligi hiyo inaendelea tena leo, wakati Yanga inayoshika nafasi ya pili itakaposhuka Uwanja wa Taifa, Dar es Salaam kuikabili Ndanda FC ya Mtwara. Ndanda inashika nafasi ya 13 kati ya timu 16 zinazoshiriki ligi hiyo ikiwa na pointi tisa na bado ipo ukanda mbaya wa timu za kushuka daraja.
Kutokana na mazingira hayo ni wazi Ndanda FC itataka kupambana ili itoke mkiani mwa msimamo wa ligi, huku Yanga nayo ikitaka kutumia mechi hiyo kuzidi kujiweka sawa kileleni.
Pia Yanga itatumia mchezo wa leo kuwafariji mashabiki wake baada ya kutolewa Nusu Fainali ya Kombe la Mapinduzi kwa mikwaju ya penalti 4-3 na URA ya Uganda Jumapili wiki iliyopita.
Akizungumza na gazeti hili, kiungo wa kimataifa wa Yanga raia wa Zimbabwe, Thabani Kamusoko, amewataka wachezaji wenzake kusahau ya Kombe la Mapinduzi na kuelekeza nguvu zao katika kupigania ubingwa wa Ligi Kuu Tanzania Bara.
Kamusoko, ambaye kwa sasa ni kipenzi cha mashabiki wa timu hiyo kutokana na uwezo wake, alisema haitapendeza kama wataendelea kupoteza nguvu kufikiria mambo yaliyopita, wakati bado wanakabiliwa na mtihani mkubwa kupigania ubingwa wa Ligi Kuu msimu huu.
“Ni matokeo ambayo yalikuja tofauti na matarajio yetu, lakini hatuwezi kupoteza muda kufikiria mambo ya Kombe la Mapinduzi cha msingi kwetu ni kuongeza nguvu kwenye mazoezi yetu, ili tuweze kupoza machungu yetu kwa kubeba ubingwa wa Tanzania Bara,” alisema Kamusoko.

Chanzo Gazeti la HabariLeo.