Tuelimishane mambo muhimu siku ya kupiga kura

WIKI tatu zilizobaki, Watanzania wenye sifa za kupiga kura waliojiandikisha watapiga kura yao ya msingi kuchagua viongozi wawatakao, ambao ni rais, mbunge na diwani, ili washirikiane nao kuleta maendeleo yao na taifa.
Wakati tukijiandaa kuelekeo kupiga kura, elimu ya uraia ni muhimu kwa wananchi ili kuwahamasisha ushiriki wao katika demokrasia na kwamba haipaswi kuwa na utashi wa kisiasa au upendeleo kwa chama chochote cha siasa.
Elimu hiyo ya upigaji kura inapaswa kuzingatia miongozo iliyowekwa ya kutofungamana na upande wowote kisiasa ili wapiga kura waelewe na kuhakikisha wanatumia vyema nafasi yao kupiga kura yao kwa usahihi bila woga wala mashaka.
Tunafahamu kwamba pamoja na wenye sifa kujiandikisha ili kupiga kura yao kwenye uchaguzi mkuu ujao, lakini sio wote wanaofahamu kusoma na kuandika, hivyo kwao kusoma machapisho yanayoelimisha elimu ya mpiga kura ni vigumu kuelewa.
Kwa maana hiyo basi, tutambue kuna changamoto hiyo ambayo kama hatutaishughulikia vyema, ni wazi kwamba kundi hilo la wasiojua kusoma na kuandika, vilevile walemavu wasioona na wasiosikia, itakuwa vigumu kwao kupata elimu hiyo.
Hivyo basi ni wajibu wetu kama jamii kushirikiana kusaidiana na pia kuelekezana bila kupotoshana mambo muhimu ya kuzingatia ili kujiweka kwenye upande sahihi wakati wa kupiga kura.
Kwa upande wa vyombo vya habari, wajibu wao ni kuendelea kuelimisha jamii na kutoa vipindi vinavyoelekeza au kuelimisha umma jinsi ya kupiga kura jambo ambalo litasaidia kupunguza uharibifu wa kura unaoweza kutokea.
Katika uchaguzi wa mwaka huu, pamoja na kwamba wananchi wengi wana mwamko na wamejitokeza kwa wingi kujiandikisha, lakini bado pia wapo wachache ambao watawahadaa wapiga kura kwa kuwapandikiza mawazo mabaya ili wasiende kupiga kura.
Mfano katika uchaguzi mkuu mwaka 2010 watu wachache walijitokeza kupiga kura pamoja ingawa jitihada za uelimishaji zilifanywa kuhusu kupiga kura lakini wachache walitumia fursa hiyo kusema hata wakipiga hawapati faida, wala hakuleti mabadiliko.
Hayo ni maoni ya wachache wasiopenda maendeleo wala demokrasia, lakini kwa uchaguzi wa mwaka huu mwamko wa wananchi kujiandikisha ulikuwa mkubwa na ni vyema mwamko huo huo utumike pia kuelimishana mambo muhimu ya kuzingatia wakati wa upigaji kura ili kuhakikisha kura haiharibiki.
Sheria ya Taifa ya uchaguzi, inaeleza wazi kwamba mtu au mpiga kura anayestahili kupiga kura ni yule aliyejiandikisha kwenye daftari la kudumu la wapiga kura ,raia wa Tanzania, umri wa miaka 18 na kuendelea na mkazi wa eneo husika la kupigia kura.
Mambo hayo ni muhimu wakati wa kupiga kura na kwamba elimu kuhusu hayo inapaswa kutolewa kwa wananchi ili wafahamu na kuondokana na dhana kwamba kwa vile wameshajiandikisha, wanaweza kupiga kura kwenye eneo lolote, ili mradi tu awe na kitambulisho cha mpiga kura.
Hivyo basi ni wajibu wa Tume ya Taifa ya Uchaguzi (NEC), ambayo ndiyo yenye wajibu wa kuelimisha wapiga kura, kufanya hivyo ili elimu ya uraia na upigaji kura iwafikie wote wenye sifa na waweze kutekeleza bila kuvunja sheria.
Mfano wapo wananchi wasiofahamu kuwa kuvaa mavazi yenye rangi za chama fulani au kuvaa nguo za chama fulani ni kosa wakati wa kwenda kupiga kura. Wengine wanavaa tu kwa vile ni nguo jambo ambalo litamfanya akose nafasi ya kupiga kura.
Sasa basi ni vyema mambo hayo muhimu yakaelezwa sasa ili ifikapo Oktoba 25, kila mmoja wetu awe na uelewa na asifanye makosa yanayoweza kumsababishia akose nafasi yake ya msingi ya kupiga kura.
Zikiwa zimebaki siku chache tu kupiga kura, ni vyema tuzitumie vyema kuelimishana hata sisi kwa sisi juu ya mambo muhimu ya kuzingatia wakati wa kupiga kura badala ya kuendelea kutupiana vijembe vya siasa baina ya wagombea tuwapendao.
Kuendelea kubishana kuhusu wagombea mbalimbali na vyama vyao hakusaidii, kinachotakiwa ni elimu kwa wananchi ili siku ya kupiga kura watumie vyema nafasi hiyo kumpigia kura mgombea wamtakaye kwa kuwa watakuwa na uhakika wa kura wapigazo zimefuata taratibu na hazitaharibika.

Chanzo Gazeti la HabariLeo.