MWILI wa mwanasiasa machachari na mwenye misimamo mikali katika ufuatiliaji wa mambo, Mchungaji Christopher Mtikila (65) unatarajiwa kuagwa kesho, Dar es Salaam. Aidha, baada ya shughuli ya kuuaga mwili wa Mtikila, aliyekuwa pia Mwenyekiti wa chama cha siasa cha DP, utasafirishwa kwenda kijijini kwao Milo wilaya ya Ludewa Mkoa wa Njombe kwa ajili ya maziko.
Akizungumza nyumbani kwa marehemu Mikocheni jijini Dar es Salaam, kaka wa marehemu, Stanley Mtikila alisema kwa sasa mwili wa marehemu umehifadhiwa katika Hospitali ya Jeshi Lugalo hadi kesho, ambapo utaagwa na kusafirishwa.
“Bado tuna majonzi makubwa kutokana na msiba wa ndugu yetu na kaka yetu mpendwa, lakini hatuna budi kuupokea kwani umeshatokea na hivi sasa mwili wake umehifadhiwa katika hospitali ya jeshi Lugalo, tunatarajia kuuaga kesho na kuusafirisha hadi kijijini,” alisema. Aliongeza kuwa siku ya maziko haijajulikana, huku akisema kama watawahi kufika kijijini kwao, basi maziko yatafanyika siku hiyohiyo.
“Maziko yatategemeana na muda tutakaofika, kama tukiwahi basi kesho hiyo hiyo tutazika lakini tukichelewa hadi siku inayofuata ndiyo tutamzika,” aliongeza. Kwa upande wake, kaka yake mwingine ajulikanaye kwa jina la Charles Mtikila, alisema wao kama familia wameupokea msiba huu kwa majonzi makubwa, lakini haina budi kukubali mipango ya Mungu, licha ya watu wanaozungumza mengi kufuatia msiba huo.
“Msiba umetokea na sisi tumeupokea kama familia, mengine yanayozungumzwa kuhusu msiba huu ni mambo ya kawaida kwani mimi mwenyewe nimekwenda eneo la tukio na kaka yetu amefariki kwa ajali ya gari na hio ndio taarifa kamili,” alisisitiza. Mtikila alifikwa na mauti baada ya gari lake aina ya Toyota Corolla, lenye namba za usajili T189 AGM, alilokuwa anasafiria kuacha njia na kupinduka eneo la Msolwa wilayani Bagamoyo mkoani Pwani katika barabara kuu ya Dar es Salaam- Morogoro.
Mtikila alikuwa akitokea mkoani Njombe, alikopita akitokea Rungwe mkoani Mbeya ambako alikwenda kuhudhuria mkutano wa kampeni wa kumnadi mgombea ubunge wa chama chake cha DP Jimbo la Rungwe, Nicodemus Atuswege Ngwale, mwishoni mwa wiki iliyopita.
Mchungaji Mtikila alizaliwa mwaka 1950 huko Ludewa na hadi mauti yanamfika, kama si kuenguliwa na Tume ya Taifa ya Uchaguzi (NEC), kwa sasa angekuwa miongoni mwa wagombea urais wa Jamhuri ya Muungano wa Tanzania. Mtikila ambaye maisha yake ya kila siku yalitawaliwa na harakati za kisiasa, haki za binadamu na mengine mengine, alienguliwa na NEC kwa kuwa hakuwa na mgombea mwenza.
Akijitetea mbele ya NEC Agosti 21, mwaka huu, Mtikila alisema: “Nimeshindwa kuja na mgombea mwenza kwa sababu mke wake ameugua presha ghafla. Jambo hilo lilimfanya ashindwe kufika hapa.”
Mtikila alidai alifika mapema NEC, lakini alilazimika kwenda Mahakama Kuu kwa ajili ya kuapa. Alidai kuwa mahakamani alitumia zaidi ya saa mbili kumsubiri mgombea mwenza, Juma Metu Juma ambaye hakutokea.
“Nilipotaka kumuona Mkurugenzi (Kailima Kombwey) nilijibiwa kuwa anashughulikia tatizo langu. Lengo lilikuwa kutaka kumueleza tatizo nililonalo. Kwanza taratibu na kanuni za NEC hazisemi chochote iwapo mgombea mwenza anapata dharura,” alisema Mtikila, ambaye alikiri kuwa hakulipa Sh milioni moja, licha ya kuwa nayo mfukoni.
Baada ya maelezo yake kutoishawishi NEC, Mchungaji Mtikila alisema: “Mimi kugombea si tatizo, ila nataka kuweka mambo sawa. Hata nisipogombea hiyo hainizuii kwenda mbinguni. Kwanza mtu mwenye uchu wa madaraka ya kwenda Ikulu anatakiwa kuepukwa kama ukoma.”
Hiyo ilikuwa mara ya pili kwa Mtikila kushindwa kutekeleza masharti na hivyo kupoteza sifa za kuteuliwa na NEC kugombea urais. Mara ya kwanza ilikuwa mwaka 2010. Alishiriki mwaka 2005 na kupata asilimia 0.27 ya kura zote, huku Rais Jakaya Kikwete akiibuka mshindi kwa asilimia 80.28.
Nje ya siasa Pamoja na shughuli za siasa, pia alikuwa mwanzilishi na Mkuu wa Kanisa la Kipentekoste la Full Salvation. Lakini pia kwa muda mwingi wa maisha yake, alijihusisha na harakati za haki za binadamu kwa kupitia kitengo cha haki za binadamu cha kanisa hilo, kiitwacho Liberty Desk.
Kanisa lake ni moja ya makanisa machache nchini yenye vitengo vya namna hiyo. Umaarufu wa Mtikila ulikua mwanzoni mwa miaka ya 1990 kutokana na uwezo wake mkubwa wa kuongea.
Upinzani wake dhidi ya muundo wa Muungano kati ya Tanganyika na Zanzibar, madai yake kuhusu kile anachokiita “Uhujumu wa uchumi unaofanywa na watu ambao aliwaita magabacholi” na kesi mbalimbali za kikatiba, alizokuwa akifungua katika Mahakama za Tanzania, ni kati ya mambo machache yaliyomfanya asikike kila kona ya nchi.
Kwa muda mrefu, chama chake cha DP hakikuweza kupata usajili wa kudumu kutokana na kukataa kwake kuitambua Zanzibar. Alikuwa akisisitiza kuwa chama chake ni cha Tanganyika na siyo Tanzania.
Hata hivyo, ilimpasa abadili msimamo wake katika miaka ya hivi karibuni kwa kukubali kutafuta wanachama kutoka Zanzibar (kama sheria ya uchaguzi inavyotaka) ndipo kikapata usajili wa kudumu.
Mwaka 2004 alihukumiwa kifungo kilichosimamishwa cha miezi sita kwa kutoa maneno ya kashfa dhidi ya mkuu wa polisi wa wilaya ya Ilala. Kwa ujumla maisha yake yamekuwa ni ya harakati muda wote, akipambana awezavyo, akisimama kidete inavyowezekana na akijikuta matatani kila uchwao.
Mchungaji Mtikila ameacha mjane, Georgia na watoto. Ubunge, urais na kesi za kikatiba Itakumbukwa kwamba, kabla ya kujaribu kuwania Urais, mara kadhaa alijaribu kuusaka ubunge wa Ludewa, kwa mfano mwaka 1997, aliwania kwa tiketi ya Chadema kwa kuwa DP hakikuwa na usajili wa kudumu.
Hata hivyo, baada ya uchaguzi mdogo, uliompa ushindi Crispin Haule wa CCM, Mtikila aliachana na Chadema na kurejea kukiimairisha chama chake. Mtikila aliyekuwa maarufu kwa watu wa rika zote, alikuwa na sifa kadhaa, mojawapo ikiwa ni kuwa kiongozi anayejishughulisha na mambo mengi mno na harakati zilizopitiliza, akiwa na ufahamu wa vitu vingi pia.
Aidha, alipambana kisheria na serikali kwa kufungua kesi za masuala mbalimbali dhidi ya serikali, zikiwemo za kikatiba. Aliwahi kufungua kesi ya kutaka wagombea binafsi kuruhusiwa katika uchaguzi wa Tanzania, wananchi wa Tanzania Bara kuruhusiwa kwenda Zanzibar bila hati za kusafirioa na vyama vya siasa kuruhusiwa kufanya mikutano bila kuomba kibali kutoka kwa mkuu wa wilaya na polisi na nyinginezo.
Na juu ya yote, Mtikila aliyekuwa hajali kupanda pikipiki au bajaji kuwahi harakati zake, zikiwemo za mahakamani, alikuwa mtu mwenye misimamo ya kipekee. Alipokuwa na ajenda zake, bila kujali hatimaye yake, alizisimamia kwa nguvu zake zote.
Mtikila ameaga dunia akiwa mwanasiasa mashuhuri nchini, akiwa na uwezo wa kuongoza kanisa (uchungaji), kuongoza chama cha siasa na kushinda mahakamani kupambana na Serikali kwenye kesi kubwa na ambazo nyingine alishinda.
Chanzo Gazeti la HabariLeo
0 comments:
Post a Comment