Kuratasi za mfano za kupigia kura zituweke mguu sawa

ZIMEBAKI siku 18 tu kuanzia leo hadi kufikia siku inayosubiriwa kwa hamu na Watanzania mwaka huu, yaani Oktoba 25, ili kutumia haki yao ya kikatiba ya kuwachagua viongozi wa kuwavusha katika kipindi cha miaka mitano ijayo. Katika uchaguzi huo mkuu Watanzania watawachagua madiwani, wabunge, wajumbe wa Baraza la Wawakilishi na rais.
Kwa kuzingatia umuhimu wa shughuli hiyo na upatikanaji wa taarifa sahihi kwa wanachi, Tume ya Taifa ya Uchaguzi (NEC) tayari imeanza kusambaza karatasi za kura za mfano kwa halmashauri zote nchini ili wagombea wahakiki majina yao.
Karatasi hizo pia zitatumika katika harakati za kutolea elimu kwa wapiga kura wafahamu wanapotakiwa kuweka alama ya vema kumchagua mgombea wanayemtaka ili kuepuka kuharibu kura zao.
Taarifa rasmi zimeeleza wazi kwamba hadi leo hii, inatarajiwa halmashauri zote nchini ziwe zimekwishapata karatasi hizo. Karatasi hizo pia zimetolewa ili kupata marekebisho katika maeneo yanayohitajika kabla ya siku yenyewe ya tukio la kupiga kura.
Kila halmashauri itapatiwa nakala 200 zitakazogawiwa kwa wagombea ili wazitumie kutolea elimu kwa wapiga kura wao na kufanya usahihi wa majina ya wagombea iwapo yatakuwa yamekosewa.
Hakuna ubishi kwamba hatua zote hizo zinalenga kutufikisha katika hatua za kutuwezesha kufanya uchaguzi huru na haki kwa wagombea na pia kwa wapiga kura kupata kile wanachokihitaji kutokana na atakayeibuka mshindi dhidi ya wapinzani wake katika kinyang’anyiro cha kupata nafasi hizo muhimu za uongozi wa nchi yetu.
Tunapenda kuwakumbusha wadau wote katika hili wakiwemo watendaji wa halmashauri, wasimamizi wa uchaguzi na wasaidizi wao, wapiga kura na wagombea kwamba kila mmoja wetu achukue nafasi yake kuhakikisha mambo yote muhimu kama yalivyopangwa yanafanyiwa kazi ipasavyo na kinyume chake atakayejaribu kufanya tofauti ashughulikiwe kwa mujibu wa sheria na taratibu kwa sababu hakutakuwa na sababu nyingine nje ya kutotutakia mema.
Tunaamini kwamba hayo yakizingatiwa hakutakuwa na malalamiko yasiyo ya lazima ya kutufikisha katika tafrani ya kuvuruga amani, utulivu, upendo na mshikamano wetu uliojengeka tangu tupate uhuru wetu Desemba 9, 1961 hadi sasa tunapotaraji kufanya uchaguzi wa kuwapata viongozi wa kutuongeza kwenye serikali ya Awamu ya Tano.
Sote ni mashahidi kwamba karibu nchi za wenzetu mbalimbali duniani inapofikia suala la kubadilisha uongozi wa juu wa nchi kwa maaana ya kufanya uchaguzi mkuu, vurugu hutawala kipindi husika kiasi cha kusababisha kuvurugika kwa amani, kusababisha vita na raia kuikimbia nchi yao wenyewe ili kuokoa nafsi zao.
Hatuna haja ya mtu yeyote kuja kutueleza hili kwa sababu sisi kama Tanzania tumekuwa tukipokea wakimbizi kutoka nchi mbalimbali kutokana na hali kama hiyo ya kutozingatia haki katika usimamizi wa masuala ya uchaguzi mkuu.
Ndiyo maana tunasema, atakayetaka kutupotosha kwa makusudi kwa maslahi yake au vikundi ili tutumbukie katika janga la vurugu, tusimwonee haya kamwe. Mungu Ibariki Tanzania.

Chanzo Gazeti la HabariLeo.