Walioteketeza familia mbaroni

JESHI la Polisi mkoani Simiyu linawashikilia watu sita, wanaotuhumiwa kuwaua kwa kuwacharanga mapanga watu watano wa familia moja hivi karibuni katika kijiji na kata ya Bugarama, wilayani Maswa.
Pia jeshi hilo lilieleza kuwa chanzo cha tukio hilo katika hatua za awali kimegundulika kuwa ni mgogoro wa ardhi na imani za kishirikina na kati ya watuhumiwa hao, mmoja ni mganga wa kienyeji.
Akitoa taarifa ofisini kwake jana, Kamanda wa Polisi mkoa wa Simiyu, Gemini Mushy alisema mbali na kukamatwa watu hao bado watuhumiwa wengine wawili wanatafutwa baada ya kutenda kosa na kufanikiwa kutoroka.
Katika tukio hilo, waliouawa kwa kukatwa mapanga ni George Charles (30) ambaye ni baba wa familia, mkewe Siku John (23) na watoto wao, Mchambi George (7) Tuma George (5) na Amos George aliyekuwa na umri wa miezi tisa.
Kwa mujibu wa Kamanda Mushy, waliokamatwa wakituhumiwa kwa mauaji hayo ni Ntange Jisesa (30), Tarange Migata (25), Paul Joseph (23), Migata Lusalaga (50), Jiherya Migata (30) akiwemo na mganga huyo wa kienyeji.
Naye Mwenyekiti wa kijiji hicho, Christopher Kulwa alisema chanzo cha tukio hilo kimeonekana kuwa watuhumiwa wote ambao walipigiwa kura ya siri na wananchi, walikuwa na chuki juu ya familia iliyotendewa unyama huo.

Created by Gazeti la HabariLeo.