Kubaki vituoni ‘kulinda kura’ ni ishara mbaya

0 Comments

JANA katika gazeti hili ukurasa wake wa mbele tuliandika taarifa iliyotolewa na Tume Ya Taifa ya Uchaguzi (NEC) iliyoonya vyama vya siasa kuhusu ushawishi wa kuwataka wafuasi wao kubaki katika vituo vya kupiga kura wakishamaliza kupiga kura.
Pamoja na kuipongeza NEC kwa kutoa tamko hilo mapema tunapenda kuunga mkono hoja ya Tume kuhusiana na tabia inayoelekea kushika kasi ya ushawishi wa uvunjaji sheria wa wazi wazi unaoandaliwa na vyama vinavyoshiriki uchaguzi mkuu.
Tunapenda kuamini kama inavyoamini NEC lengo la madai ya kulinda kura haliko kwa nia hiyo ni ajenda ya siri ambayo inaweza kabisa kudhuru uhuru wa uchaguzi wenyewe. Ni kweli kabisa kitendo cha kujikusanya kitasababisha hofu kwa wapigakura wengine watakaokuwa wanaenda vituoni kwa kukuta makundi ya watu, na tunavyojua makundi ya vyama vingine hugeuka kuwa kichochea cha uvunjifu wa amani.
Kuna sheria na kanuni zinazoendesha uchaguzi ambazo vyama vimekubaliana, kitendo cha kushawishi watu wabaki katika maeneo ya upigaji kura, kutaleta mhemko usiokuwa wa kawaida hasa ikizingatiwa kwamba vyama vinavyoshiriki ni vingi na si kimoja au viwili.
Aidha kama ilivyoshangaa NEC kwa nini vyama vinang’ang’ania kubaki katika vituo vya kupigia kura na kuleta hisia kwamba vina ajenda ya siri, tunajiuliza kulikuwa na haja gani ya kukubaliana katika maadili na ufuataji wa utaratibu kisha unandaa mazingira ya ghasia na uvunjifu wa amani?
Tunaamini kwamba wananchi watapuuza maneno ya wanasiasa hao uchwara ili uchaguzi usijawe na hofu na watu wakashindwa kutumia nafasi yao ya uhuru kupiga kura. Ni vyema kila mtu kwa nafasi yake apinge kwa nguvu zote kitendo cha kurundikana katika vituo vya kura baada ya kupiga kura na sheria zinazohusu uchaguzi zikazingatiwa kwa kuwa zimetengenezwa kanuni zilizokubalika na wote wanaoshiriki.
Hali ya sasa ya kuandaa hasa makundi ya vijana yana athari zake kisiasa na kijamii na kwamba vurugu zitakapoibuka kutokana na kugongana kwa makundi katika eneo husika, waathirika si wa eneo hilo tu bali Tanzania nzima kwani tutakuwa tumetia dosari uchaguzi.
Ni vyema wananchi na hawa wapiga kura wasikubali kutumika vibaya kusababisha fujo kwa maslahi ya wanasiasa wachache ambao maslahi ya taifa ni adimu kwao. Ni vyema Watanzania wakasoma alama za nyakati na kujiepusha na uvunjifu wa amani unaoshawishi mapema na wanasiasa wenye uchu wa madaraka kwa kile wanachodai ulinzi wa kura.
Ni kweli hakuna ulinzi wa kura wa stahili hiyo hasa ikizingatiwa kwamba kila kitu kinafanyika kituoni pale, kinafanyika kwa utaratibu wa maridhiano ya pande zinazoshiriki katika uchaguzi. Tunatoa wito kwa Watanzania wanaoitakia mema nchi hii kupuuza kwa makusudi kabisa miito kama hii ya ulinzi wa kura kwa kubaki vituoni ili tuwe na uhakika uchaguzi wetu unafanyika kwa namna inavyostahili.

Chanzo Gazeti la HabariLeo.