WANANCHI wa Kitongoji cha Malamo, kilichopo katika Kijiji cha Wami Sokoine, wilayani Mvomero, mkoa wa Morogoro waliobomolewa nyumba zao baada ya kudaiwa kujenga ndani ya hifadhi ya msitu wa kuni uliopo wilayani humo wamezua kizaazaa kwa kuzuia msafara wa Naibu Waziri wa Ardhi, Nyumba na Maendeleo ya Makazi , Anjelina Mabula wakimtaka awasikilize kero zao.
Baadhi ya wananchi hao waliamua kusimama bila woga katikati ya barabara kuu ya Morogoro- Dodoma wakiwa na mabango yaliyokuwa na ujumbe wa kumtaka Naibu Waziri huyo asimame juzi katika eneo la Mkundi na awasikilize kero zao.
Mara baada ya Naibu Waziri huyo kusimama na kuelekea pembezoni mwa barabara kuu hiyo ili kuwasikiliza kero zao wananchi hao walidai wamebomolewa nyumba zao kwa njia isiyo halali na kwamba walikuwepo katika kitongoji hicho kilichopo katika kijiji cha Wami Sokoine eneo la wilaya ya Mvomero kwa muda mrefu kutokana na baraka ya serikali ya kijiji hicho.
Walidai kuandika barua kwa serikali ya wilaya na mkoa wa Morogoro mwaka 2013 na Desemba mwaka jana za kuomba serikali ibatilishe eneo hilo linaloelezwa kuwa ni hifadhi ya msitu wa kuni liweze kuwa la makazi ili kupunguza uhaba wa maeneo ya makazi kwa wananchi wa manispaa .
“Unakuomba Naibu Waziri utambue kuanzia sasa kuwa sisi zi wavamizi bali tumeonewa,” alisema mkazi huyo kwa kwa niaba ya wenzake. Akijibu hoja za wananchi hao, Naibu Waziri wa Ardhi, Nyumba na Maendeleo ya Makazi, Anjelina Mabula alisema aliamua kusimama kuwasikiliza kwa kuwa yeye ni kiongozi na ni wajibu wake kusikiliza kero zao na baada ya kusikiliza kero zinazowakabili aliwataka wananchi hao wawe na subira kwa vile suala la maombi yao yaliyowasilishwa kwa viongozi wa ngazi ya wilaya na mkoa bado yanafanyiwa kazi.
Mabula aliwataka pia waende katika ofisi za halmashauri ya Manispaa na wilaya kupata viwanja vilivyopimwa na vibali vya kujenga makazi yao huku wakisubiri muafaka wa suala lao.
Chanzo Gazeti la HabariLeo.
0 comments:
Post a Comment