Simba yang’oka Mapinduzi

SIMBA jana imetema ubingwa wa michuano ya Kombe la Mapinduzi baada ya kukubali kipigo cha bao 1-0 kutoka kwa Mtibwa Sugar. Katika mechi hiyo iliyochezwa kwenye uwanja wa Amaan mjini hapa, Simba ilionekana kutawala karibu muda mwingi wa mchezo lakini washambuliaji wake mara kadhaa walikosa mabao ya wazi.
Ibrahim Jeba ndiye aliyefunga bao hilo pekee katika mechi hiyo ya jana na kuimaliza Simba iliyotamba kutetea taji lake. Jeba alifunga bao katika dakika ya 45 baada ya kuuwahi mpira uliotemwa na mlinda mlango wa Simba Peter Manyika.
Simba ilianza kipindi cha pili kwa kufanya mabadiliko ambapo iliwatoa Mussa Hassan Mgosi, Emily Nimuboma na Awadh Juma na nafasi zao kuchukuliwa na Brian Majegwa, Ibrahim Ahibu na Said Ndemla. Hata hivyo mabadiliko hayo hayakuisaidia Simba zaidi ya washambuliaji wake kukosa mabao mara kwa mara.
Dakika ya 75 Daniel Lyanga alikosa bao baada ya kubaki peke yake na kipa Said Mohammed lakini alipiga vibaya mpira ukapanguliwa na kipa huyo. Zikiwa zimesalia dakika za nyongeza Abdi Banda alikosa bao lingine la wazi baada ya kubaki peke yake na kipa lakini akapaisha.
Mtibwa sasa inatarajiwa kucheza fainali keshokutwa na mshindi wa mechi kati ya Yanga na URA ya Uganda iliyotarajiwa kuchezwa jana usiku.

Created by Gazeti la habariLeo.