‘Hatutateketeza meno ya tembo’

Waziri wa Maliasili na Utalii, Profesa Jumanne Maghembe.

SERIKALI imetoa tamko kuwa kwa sasa haina mpango wa kuteketeza meno ya tembo yaliyohifadhiwa ambayo yametokana na vitendo vya ujangili na vifo asilia vya tembo.
Tamko hilo limetolewa hivi karibuni na Waziri wa Maliasili na Utalii, Profesa Jumanne Maghembe alipokuwa anazungumza na Balozi wa Marekani nchini, Mark Childress.
Balozi huyo alimtembelea waziri Maghembe ofisini kwake kujadili maendeleo ya Sekta ya Maliasili nchini.

Akiwa hapo, alipendekeza Tanzania ichome sehemu meno ya tembo yaliyohifadhiwa ili kutoa ujumbe mzito duniani juu ya dhamira ya Serikali kukomesha biashara hiyo haramu.
Hata hivyo, katika majibu yake, Profesa Maghembe alisema; “Naomba niweke wazi kuwa kwa sasa hatupo tayari kuteketeza meno haya. Tunaweza kuyatumia kwenye tafiti za kisayansi au vielelezo kwa ajili ya kesi za ujangili ambazo zipo mahakamani na nyingine ambazo bado zinafanyiwa uchunguzi.”
Hatua hiyo imekuja huku nchi jirani za Kenya na Malawi zimeteketeza meno yake ya tembo yaliyohifadhiwa ikielezwa kufanya hivyo ni njia mojawapo ya kuishawishi dunia juu ya umuhimu wa kukomesha biashara haramu ya meno ya tembo. Nchi nyingine zilizofanya hivyo ni Chad, Ubelgiji, Ufaransa, China, India, Marekani na Ureno.

Kwa upande wa nchi ambazo zina msimamo sawa na Tanzania katika kuendelea kuhifadhi meno ya tembo ni pamoja na Afrika ya Kusini, Botswana na Zimbabwe.
Akizungumzia kuendeleza sekta ya Maliasili nchini, Profesa Maghembe amemuomba Balozi Childress kushirikiana na Serikali ya Tanzania katika kukuza sekta hiyo kwa kuleta wawekezaji kutoka Marekani, lakini pia kusaidia katika mapambano dhidi ya ujangili.

Aliongeza kuwa Tanzania ina fursa nyingi ambazo zinahitaji uwekezaji mkubwa ikiwemo hoteli za kitalii, fukwe za kisasa na kuendeleza vivutio mbalimbali vilivyomo hapa nchini.
Pia alimshukuru balozi huyo kwa misaada mbalimbali kutoka Serikali ya Marekani ya kuendeleza sekta ya Maliasili nchini ukiwemo wa hivi karibuni wa mbwa maalumu wa kusaidia utambuzi wa rasilimali za maliasili zinazoweza kutoroshwa nje ya nchi kupitia bandari na viwanja vya ndege.

Chanzo habariLeo.