MGOMBEA Urais wa CCM visiwani Zanzibar, Dk Ali Mohammed Shein ametangazwa na Tume ya Uchaguzi Zanzibar (ZEC) kuwa mshindi kwa kupata kura 299,982 sawa na asilimia 91.4. Kwa ushindi huo, Dk Shein ataiongoza tena Zanzibar kwa muda wa miaka mitano akiwa Rais wa Serikali ya Mapinduzi Zanzibar pamoja na Mwenyekiti wa Baraza la Mapinduzi.
Mwenyekiti wa ZEC, Jecha Salim Jecha ambaye amekuwa mafichoni tangu atangaze kufuta uchaguzi wa Oktoba 25, mwaka jana, jana alijitokeza hadharani kutangaza matokeo ya jumla ya uchaguzi uliofanyika juzi katika visiwa vya Unguja na Pemba. Tofauti na utaratibu uliozoeleka kuwa ZEC hutangaza kura walizopata wagombea urais kutoka kila jimbo na baadaye kutangaza mshindi wa jumla, hali ilikuwa tofauti jana maana matokeo ya jumla yalitangazwa kabla ya kutangaza matokeo ya kila jimbo.
Hata hivyo, wakati anatangaza matokeo hayo ya jumla, Jecha hakueleza sababu ya kuanza kutangaza matokeo ya jumla kabla ya kutangaza matokeo ya awali kutoka katika kila jimbo la uchaguzi. Majimbo ya uchaguzi ya ZEC ni 54.
Matokeo ya Uchaguzi Katika matokeo aliyoyatangaza jana Jecha yanaonesha kuwa mgombea wa ACT Wazalendo Khamid Idd Lila alipata kura 1,225 (0.4%), Juma Ali Khatib (ADA Tadea) kura 1,562 (0.5), Hamad Rashid Mohamed (ADC) kura 9,734 (3.0%), Said Soud Said (AFP) kura 1,303 (0.4%), Ali Khatib Ali (CCK) kura 1,980(0.6%) na Mohammed Masoud Rashid (Chaumma) kura 493 (0.2%).
Seif Sharif Hamad (CUF) kura 6,076 (1.9%), Tabu Mussa Juma wa Demokrasia Makini alipata kura 210 (0.1%), Abdallah Komba Khamis wa DP kura 512 (0.2%), Kassim Bakari Ali (Jahazi Asilia) alipata kura 1,470 (0.4), Seif Ali Idd (NRA) 266 sawa na asilimia 0.1, Issa Mohamed Zonga (SAU) kura 2,018 (0.6% na Hafidh Hassan Suleiman (TLP) alipata kura 1,496 sawa na asilimia 0.5.
Idadi ya wapiga kura kwa mujibu wa Jecha ni 503,580 na watu waliopiga kura juzi ni 341,865 ambayo ni sawa na asilimia 67.9 ya watu wote waliojiandikisha. Kura zilizoharibika zilikuwa ni 13,538 sawa na asilimia 4.0.
Hata hivyo, vyama kama CUF, ACT Wazalendo, Chaumma, Jahazi Asilia na NRA ambavyo vilisimamisha wagombea urais katika uchaguzi wa 2015 vilishatangaza kutoshiriki uchaguzi huo wa marudio uliofanyika juzi. Jecha: Vyama vyote vimeshiriki Akizungumza jana kabla ya kumtangaza mshindi wa kiti cha urais, Jecha alisema mara tu baada ya ZEC kupitisha uamuzi wa kufanyika kwa uchaguzi wa marudio Machi 20, 2016, Tume ilifanya mawasiliano na vyama vyenye wagombea kwa lengo la kuwapa taarifa juu ya matayarisho ya uchaguzi huo ili waanze taratibu za uchaguzi.
Alisema kutokana na taarifa hiyo baadhi ya vyama vilitoa taarifa kupitia vyombo vya habari kuwa havitashiriki katika uchaguzi na kuwataka wagombea wao kuandika barua za kutoshiriki katika upigaji kura huo. Alisema wagombea wa vyama hivyo waliandika barua kwa ofisi za wilaya na makao makuu ya tume, hata hivyo hakuna mgombea hata mmoja aliyewasilisha barua tume aliyefuata utaratibu wa kujitoa katika uchaguzi kama ilivyofafanua katika Kanuni za Uchaguzi wa mwaka 2015.
Alifafanua taratibu hizo kuwa mgombea urais angejiondoa kwa kutoa taarifa ya maandishi aliyotia saini mwenyewe atakayowasilisha kwa mwenyekiti wa tume si zaidi ya saa 10 za jioni ya siku ya uteuzi ambayo alifafanua kuwa kwa uteuzi wa wagombea wa uchaguzi wa juzi ulifanyika Septemba 6, 2015. Alisema utaratibu huo unawahusu wagombea uwakilishi ambao walitakiwa kuwasilisha barua kwa msimamizi wa uchaguzi katika muda huo kabla ya saa 10.
Alisema wagombea waliokuwa na nia ya kujiondoa waliwasilisha barua zao kwa kuchelewa na hawakuambatanisha barua hizo na tamko la kisheria lililotiwa saini mbele ya Jaji wa Mahakama Kuu kwa wagombea urais na ya Hakimu Mkazi kwa wagombea uwakilishi na Diwani. “Kwa kuwa utaratibu wa kikanuni haukufuatwa, tume ilibaki na uamuzi kuwa pamoja na barua hizo, wagombea wote walioteuliwa na tume ni halali kwa uchaguzi mkuu wa marejeo na tuliwapatia haki zote wanazostahiki kupatiwa wagombea wa uchaguzi,” alisema Jecha.
Dk Shein aahidi kutenda haki Mara baada ya kutangazwa mshindi na kupokea cheti cha ushindi, Dk Shein aliahidi kutenda haki kwa kila Mzanzibari na kwamba hatamdhulumu mtu yeyote haki yake, badala yake alisema atahakikisha Zanzibar inapaa kimaendeleo kwa kusogeza ukuaji wa uchumi uwe kati ya asilimia 8 hadi 10 katika miaka mitano ijayo.
“Nafahamu changamoto ya kazi hii, niko tayari kutumika tena kwa uaminifu na nia yangu kwa watu wa Zanzibar ni kuwaletea maendeleo, naahidi kuwa mambo mazuri yanakuja kwa watu wote bila kujali itikadi zao za kisiasa,” alisema Dk Shein. Kuhusu mgogoro wa kisiasa uliopo visiwani hapa, Dk Shein aliahidi kuushughulikia na kwamba peke yake hawezi isipokuwa akaomba ushirikiano kutoka kwa wananchi wote “Wote naomba tushirikiane kutatua changamoto za kisiasa zilizoko hapa kwetu kwani ni jukumu letu sote kuilinda na kuitetea Zanzibar yetu,” alisema.
Alivipongeza vyombo vya ulinzi kwa kuweka ulinzi uliowezesha watu wapige kura kwa amani na utulivu. Aliahidi kuendeleza amani hiyo na kueleza bayana kuwa hatakuwa na mjadala na mtu yeyote ambaye yupo kwa ajili ya kuvuruga amani ya nchi. Pia aliwaasa wananchi wa Zanzibar kupendana na kushirikiana katika shughuli zao za kijamii wakati Serikali inajipanga kuondoa changamoto zinazowakabili wananchi kwa kutumia uwezo uliopo wa Serikali.
CCM yazoa majimbo yote Pemba, Unguja Aidha, CCM imeibuka na ushindi mnono wa kishindo wa majimbo yote 18 ya uchaguzi katika kisiwa cha Pemba kwa nafasi ya Uwakilishi na Udiwani ambayo katika uchaguzi uliopita yalikuwa yameshikiliwa na CUF. Kwa mujibu wa Ofisa Mdhamini wa Tume ya Uchaguzi ya Zanzibar Pemba, Ali Mohamed Dadi, matokeo ya uchaguzi ya wajumbe wa Baraza la Wawakilishi yanaonesha CCM imeyachukua majimbo yote ya Pemba na kuviacha vyama vingine vikishindwa kuambuliwa hata jimbo moja.
Kwa upande wake, Naibu Katibu Mkuu wa CCM Zanzibar, Vuai Ali Vuai amethibitisha kuwa CCM imeshinda majimbo yote 36 ya uwakilishi katika kisiwa cha Unguja. Pemba wafurahia ushindi wa Shein Wananchi wa kisiwa cha Pemba katika mitaa mbalimbali walifurahia ushindi wa mgombea wa CCM katika nafasi ya urais wa Zanzibar, Dk Ali Mohamed Shein baada ya kutangazwa na Tume ya Uchaguzi Zanzibar (ZEC).
Katika Mtaa wa Chake Chake pamoja na Wawi Pemba jimbo ambalo mgombea wa nafasi ya urais kwa tiketi ya ADC, Hamad Rashid Mohamed alipiga kura, walionekana wakishangilia ushindi huo ambao umekuja baada ya kufanyika kwa uchaguzi wa marudio. “Huu ni ushindi wetu wa CCM lazima tushangilie kwa nguvu zote kwa sababu umetokana na jasho la kujituma na kufanya kazi kwa bidii kuhamasisha wapiga kura ambapo kazi hiyo tuliifanya katika kipindi kigumu,” alisema mkazi wa eneo hilo, Juma Haji.
Mafunda Said ambaye ni mwanachama wa Chama Cha Mapinduzi Jimbo la Wawi, alisema ni ushindi ambao wanachama wa chama hicho wanapaswa kushangilia kwa nguvu zote kwa sababu umekuja katika kipindi kigumu zaidi baada ya kuibuka kwa siasa za chuki na uhasama Pemba ikiwemo kuchomeana moto nyumba.
“Huu ni ushindi wetu ambao tunalazimika kuushangilia kwa nguvu zote kwa sababu sisi CCM tulikuwa katika wakati mgumu ikiwemo wapinzani kututisha pamoja na kuchomewa nyumba zetu moto ili tusiweze kwenda kupiga kura,” alisema Said. Mkazi wa Mtaa wa Tibitinzi ambaye alijitambulisha kwamba ni mfuasi wa CUF aliwataka wananchi wadumishe amani na utulivu kwa sababu baada ya uchaguzi maisha yanaendelea kama kawaida.
“Mimi ni mfuasi wa CUF kwangu kubwa naomba amani na utulivu hata watu wanaofurahia ushindi huo wazingatie suala hilo ili isiwe kero kwa wengine na kuanza kusababisha fujo na vurugu,” alisema. Hata hivyo, mwandishi wa gazeti hili alipotembelea wilaya ya Wete ambayo ni ngome ya CUF, wananchi wengi walikuwa wamejikusanya vikundi kwa vikundi wakitafakari uchaguzi pamoja na matokeo yake.
Katika uchaguzi wa marudio wafuasi wengi wa CUF walisusia uchaguzi huo kutokana na maelekezo yaliyotolewa na mgombea wa nafasi ya urais wa Zanzibar katika Uchaguzi Mkuu wa Oktoba 25, mwaka jana, Maalim Seif Sharif Hamad kwa madai kwamba uchaguzi uliofutwa ulikuwa halali.
Rais Magufuli ampongeza Shein Rais John Magufuli amemtumia salamu za pongezi Rais Mteule wa Zanzibar, Dk Shein kutokana na ushindi wake huo, akisema umedhihirisha imani na matumaini makubwa waliyonayo Wazanzibari kwake na kwa CCM. Aidha, Rais Magufuli amewapongeza wananchi wa Zanzibar kwa kushiriki katika uchaguzi huo kwa amani na utulivu, na hatimaye kumpata mshindi wa kiti cha Urais ambaye atawaongoza kwa kipindi cha miaka mitano.
“Naomba nikupongeze kwa dhati Mheshimiwa Rais Mteule, Dk Ali Mohamed Shein kwa ushindi ulioupata, ushindi ambao umeonesha kuwa wananchi wa Zanzibar bado wanahitaji uwaongoze kwa kipindi kingine cha miaka mitano,” alisema Rais Magufuli. Dk Magufuli pia ameahidi kuwa Serikali ya Jamhuri ya Muungano wa Tanzania itaendelea kufanya kazi bega kwa bega na SMZ na amewataka Wazanzibari wote kujielekeza katika maendeleo kwa kuwa uchaguzi umekwisha.
“Ndugu zangu wa Zanzibar uchaguzi umekwisha, kilichobaki sasa ni kushirikiana na serikali yenu kuijenga Zanzibar na ninaamini mnao wakati mzuri wa kuijenga Zanzibar yenye maendeleo chini ya uongozi wa Dk Ali Mohamed Shein,” alisisitiza Dk Magufuli. Serikali ya Umoja wa Kitaifa yazikwa Serikali ya Umoja wa Kitaifa (SUK) iko njia panda kutokana na matokeo yaliyotangazwa jana na ZEC kuonesha kuwa Chama Cha Mapinduzi (CCM) peke yake ndicho chenye haki ya kuunda Serikali.
Ni CCM pekee ambayo mgombea wake wa urais amepata zaidi ya asilimia 10 ya kura na ndiyo imezoa wawakilishi karibu wote na hivyo kubaki chama pekee chenye sifa ya kuingia kwenye serikali ya umoja wa kitaifa. Mshindi wa pili wa matokeo ya kura za urais ni Hamad Rashid Mohamed aliyeambulia kura 9,734 sawa na asilimia 3. Akizungumzia hatma ya SUK, alisema serikali hiyo itaendelea kuwepo kwani Rais aliyepo madarakani lazima ateue watu kutoka kwenye vyama vya upinzani kuunda serikali hiyo.
Alisema kwamba yeye ana matumaini makubwa kuwa Dk Shein atamteua yeye awe makamu wa kwanza wa rais kwa sababu katiba inaelekeza kuwa mshindi anayefuatia kwa kura za urais ndiye mwenye sifa. Mwanasheria wa ZEC, Issa Khamis alisema kwamba Katiba ya Zanzibar iliyofanyiwa marekebisho inafafanua kuwa mgombea aliyepata kura sio chini ya asilimia 10 ndiye ataingia kwenye serikali hiyo na akaongeza kuwa Katiba hiyo iko kimya kama sifa hiyo haitakuwepo.
Alifafanua kuwa kutokana na hali hiyo kuundwa kwa Serikali hiyo kutategemea na maamuzi na utashi wa Rais aliyeshinda kwenye uchaguzi huo. Kwa upande wake, Naibu Katibu Mkuu wa CCM Zanzibar, Vuai Ali Vuai alikiri kuwa kwa kuwa hakuna chama ambacho kimefikisha asilimia 10 ya kura za urais isipokuwa CCM kama inavyotamkwa na Katiba ya Zanzibar.
Vuai alisema serikali ya kitaifa inaundwa kikatiba na kama hakuna chama ambacho kina sifa za kuingia kwenye serikali hiyo ni wazi kuwa hapo uundwaji wake unategemea busara na maamuzi ya Rais aliyepo madarakani. “Katiba ya Zanzibar inasema chama chenye sifa ya kuingia kwenye serikali ya umoja wa kitaifa kimewekewa kifungu maalum kuwa ni lazima kipate kura za urais walau asilimia 10 kwa matokeo ya leo hakuna chama kilichopata asilimia hiyo isipokuwa Chama Cha Mapinduzi.
“Kwa hiyo kwa haraka haraka unapata majibu hiyo maana yake nini na huko mbele katiba hiyo inasema kama hujapata hiyo asilimia 10 basi upate viti vingi kwenye baraza la wawakilishi, lakini katika uchaguzi huu viti vyote vimechukuliwa an CCM. Msajili wa Vyama vya Siasa, Jaji Mtungi alipoulizwa kuhusu maoni yake kama kwa matokeo hayo nini hatima ya Serikali ya Umoja wa Kitaifa alisema hawezi kuzungumzia jambo hilo.
Aliyekuwa Rais wa Chama cha Wanasheria wa Zanzibar, Awadhi Said, alisema suala la uwepo wa Serikali ya Umoja wa Kitaifa ni la kikatiba na kwamba muundo na uwepo wake umeidhinishwa kikatiba. Akizungumza jana kwa simu, alisema katiba inatamka wazi matakwa ya atakayekuwa Makamo wa Kwanza wa Rais lazima apate asilimia 10 ya kura za urais na huo ndiyo msingi wa awali na sio kusubiri busara ya Rais.
Muundo wa SUK Serikali ya Umoja wa Kitaifa (SUK) imetamkwa katika Katiba ya Zanzibar ya mwaka 1984 Toleo la 2010 Kifungu cha 9(3). Kifungu hicho kinasema “ Muundo wa Serikali ya Mapinduzi ya Zanzibar utakuwa wa Umoja wa Kitaifa na utendaji wa kazi zake, utafanywa katika utaratibu utakaohakikisha kuendelezwa kwa umoja nchini na lengo la kufikia demokrasia”. Katiba hiyo ilianzisha cheo cha Makamu wa Kwanza wa Rais na Makamu wa Pili na kufuta wadhifa wa Waziri Kiongozi.
Kwa mujibu wa Marekebisho ya 10 ya Katiba, Makamo wa Kwanza wa Rais atateuliwa na Rais baada ya kushauriana na chama cha siasa kilichopata nafasi ya pili katika matokeo ya kura ya uchaguzi wa Rais.
Kifungu cha 39(3) cha Katiba hiyo kinasema kuwa Makamo wa Kwanza wa Rais atatakiwa awe na sifa za kumwezesha kuchaguliwa kuwa Mjumbe wa Baraza la Wawakilishi ; na atateuliwa na Rais baada ya kushauriana na chama kilichopata nafasi ya pili katika matokeo ya kura ya uchaguzi wa Rais, kama chama hicho kilichopata nafasi ya pili katika matokeo ya kura ya uchaguzi wa Rais, kitapata asilimia kumi ya kura zote za uchaguzi wa rais.
Katiba hiyo inasema Makamu wa Pili wa Rais atateuliwa na Rais kutoka miongoni mwa wajumbe wa Baraza la Wawakilishi kutoka katika chama cha siasa anachotoka Rais.
Chanzo HabariLeo
0 comments:
Post a Comment