Vigogo watatu kampuni hodhi ya Reli kizimbani

Aliyekuwa Murugenzi Mkuu wa Kampuni Hodhi ya Rasilimali za Reli Tanzania (RAHCO), Benhard Tito (kushoto) na wenzake, Kanji Mwinyijuma na Emmanuel Masawe wakiwa katika Mahakama ya Hakimu Mkazi Kisutu Dar es Salaam.

MABOSI watatu wa Kampuni Hodhi ya Rasilimali za Reli Tanzania (RAHCO), wamepandishwa kizimbani wakikabiliwa na mashitaka ya matumizi mabaya ya madaraka na kuisababisha serikali hasara ya dola 527, 540 za Marekani.
Washitakiwa hao waliosimamishwa kazi na Rais John Magufuli mwishoni mwa mwaka jana, walifikishwa mbele ya Hakimu Mkazi Mkuu wa Mahakama ya Hakimu Mkazi Kisutu, Thomas Simba na kusomewa mashitaka manane.

Wakili wa Serikali, Thimos Vitalis aliwataja washitakiwa hao kuwa ni aliyekuwa Mkurugenzi Mkuu wa Kampuni hiyo, Mhandisi Benhard Tito, Raia wa Kenya anayedaiwa kuwa dalali wa zabuni, Kanji Mwinyijuma na aliyekuwa Katibu wa kampuni hiyo, Emmanuel Massawe.
Akisoma mashitaka, Wakili Vitallis alidai kuwa kati ya Septemba mosi 2014 na Septemba 30, 2015, Dar es Salaam, washitakiwa kwa pamoja walikula njama ya kutenda kosa. Vitalisi alidai katika mashitaka yanayomkabili Tito, Februari 27, mwaka jana katika ofisi za kampuini hiyo zilizopo Ilala Dar es Salaam, alitumia vibaya madaraka baada ya kuidhinisha kampuni ya Rothschild (South Africa) Property kuwa mshauri katika mpango wa ujenzi wa Reli ya Kati, bila kuidhinishwa na Bodi ya Zabuni ya Kampuni hiyo.

Alidai Machi 12, mwaka jana katika ofisi za Rahco, Tito na Massawe walisaini barua ya kuikubali kampuni ya Rothschild (South Africa) Property kutoa huduma ya ushauri wa kifedha katika ujenzi wa Reli ya Kati bila kuidhinishwa na bodi.

Aidha, wanadaiwa kati ya Machi 12 na Mei 20, mwaka jana wakiwa ofisini kwao, waliacha majukumu yao kwa kushindwa kuwasilisha mkataba wa Kampuni ya Rothschild kwa Mwanasheria Mkuu wa Serikali (AG).

Wanadaiwa pia Mei 20, walitumia madaraka yao vibaya kwa kusaini mkataba na kuingia makubaliano na kampuni hiyo katika masuala ya ushauri. Katika mashitaka mengine, inadaiwa kati ya Mei 20 na Juni 20, mwaka jana, walishindwa kuwasilisha nakala za mkataba wa makubaliano wa kampuni hiyo na kampuni ya Rahco, kwa Mwanasheria Mkuu wa Serikali (AG), Mkaguzi wa ndani na Mamlaka ya Mapato Tanzania (TRA).

Wakili Vitalis alidai kati ya Machi Mosi na Septemba 30, mwaka jana kwa pamoja walikubaliana kuidhinisha makubaliano ya kampuni hiyo katika masuala ya kiushauri na kusababishia kampuni hasara ya dola za Kimarekani 527, 540, ambazo zilishalipwa kiwango cha awali benki.
Aliendelea kudai kuwa Agosti 18, mwaka jana, Tito alitumia madaraka yake vibaya kwa kutoa zabuni ya upendeleo kwa kampuni ya Ujenzi wa Reli ya China Construction Corporation. Inadaiwa katika zabuni hiyo, kampuni ilipewe kazi ya ujenzi wa reli ya kilometa mbili yenye kiwango cha kisasa kuanzia Soga ikiwa na thamani ya dola za Marekani 2, 312, 229.39 bila kuidhinishwa na Bodi ya Zabuni ya Reli.

Washitakiwa hawakutakiwa kujibu mashitaka yao kwa kuwa mahakama hiyo haina uwezo wa kusikiliza shauri hilo na upande wa jamhuri ulidai upelelezi wa kesi hiyo haujakamilika. Washitakiwa walirudishwa rumande na Hakimu Simba aliahirisha kesi hiyo hadi Machi 18, mwaka huu kwa ajili ya kutoa uamuzi kama washitakiwa watapewa dhamana.

Chanzo HabariLeo.