Rais Magufuli atii agizo la Makonda

Raisi John Magufuli akifanyiwa uhakiki wa silaha na Mkaguzi Msaidizi wa Polisi, Neema Laizer, Ikulu Dar es Salaam jana ikiwa ni utekelezaji wa agizo la Mkuu wa Mkoa wa Dar es Salaam, Paul Makonda la kuhakikiwa silaha kwa wakazi wote wa jiji wanaomiliki silaha.

RAIS John Magufuli amekuwa mtu wa kwanza kutekeleza agizo la Mkuu wa Mkoa wa Dar es Salaam, Paul Makonda la kuhakiki silaha baada ya bunduki zake mbili aina ya Shot gun na bastola kuhakikiwa nyumbani kwake Ikulu, Dar es Salaam.

Uhakiki huo umefanywa na maofisa wa Jeshi la Polisi wakiongozwa na Kamanda wa Polisi wa Kanda Maalumu ya Dar es Salaam, Kamishna Simon Sirro. Akizungumza baada ya kukamilika kwa kazi hiyo, Rais Magufuli alimpongeza Makonda na Jeshi la Polisi kwa kuendesha uhakiki wa silaha, na alitoa mwito kwa watu wote wanaomiliki silaha nchi nzima kuhakikisha zinahakikiwa.
Makonda juzi alitoa miezi mitatu kwa wenye silaha kuhakiki silaha zao na muda huo utamalizika Julai Mosi mwaka huu. Rais Magufuli pia alilitaka Jeshi la Polisi kuongeza juhudi za kukabiliana na watu wanaojihusisha na vitendo vya uhalifu ili kutokomeza kabisa vitendo hivyo.

“Ni aibu kumuona askari Polisi mwenye silaha ananyang’anywa silaha, ni aibu, na nasema hiyo ni aibu, mpaka jambazi akunyang’anye silaha na wewe una silaha?” Amehoji Rais Magufuli.
Naye Kamanda wa Polisi wa Kanda Maalumu ya Dar es Salaam, Kamishna Sirro alimshukuru Rais Magufuli kwa kuunga mkono kazi hiyo na alisema Polisi imejipanga kuhakikisha kazi hiyo inafanyika kwa mafanikio.

Katika hatua nyingine, Rais Magufuli ametaka pande zinazogombea kiti cha Umeya katika Jiji la Dar es Salaam, kukamilisha mchakato wa kumpata Meya katika uchaguzi uliopangwa kufanyika leo badala ya kuendelea kulumbana.

Dk Magufuli alisema upande wowote uwe tayari kupokea matokeo ya uchaguzi huo ili Meya apatikane na Jiji liweze kuendelea na mipango yake ya kuwahudumia wananchi bila vikwazo.
“Mahali tunapostahili kushinda kama tumeshinda tushinde kweli, lakini mahali tunaposhindwa napo tukubali kushindwa, na hiyo ndio demokrasia ya kweli,” aliongeza Rais Magufuli.

Wakati huo huo, Mwandishi Wetu, Flora Mwakasala anaripoti kuwa Mahakama ya Hakimu Mkazi Kisutu imetupilia mbali ombi la kuzuia uchaguzi wa umeya na unaibu meya wa Jiji la Dar es Salaam unaotarajiwa kufanyika leo, na kuamuru uchaguzi huo ufanyike kama ulivyopangwa.
Uamuzi huo ulitolewa na Hakimu Mkazi Mkuu, Warialwande Lema, kwa kuwa Mahakama imeona hakuna sababu zozote za msingi zilizowasilishwa na walalamikaji kuzuia uchaguzi huo.

Maombi ya kuzuia uchaguzi huo yaliwasilishwa jana mchana na Suzan Massawe na Kumjhi Mohammed kupitia kwa Wakili wao Elias Nawela dhidi ya Mkurugenzi wa Jiji la Dar es Salaam.
Katika maombi yao, waliiomba Mahakama itoe zuio la kufanyika uchaguzi huo pia iamuru hali ibaki kama ilivyo hadi kesi ya msingi itakaposikilizwa na kutolewa uamuzi, kwa kuwa walalamikaji katika kesi hiyo, hawajapewa haki yao ya kualikwa kushiriki katika uchaguzi huo.

Akisoma uamuzi huo, Hakimu Lema alisema Mahakama haioni sababu za msingi zilizowasilishwa na walalamikaji kuzuia kufanyika kwa uchaguzi huo pia hawajaleta uthibitisho kama wao siyo miongoni mwa wapiga kura.
Aidha alisema, kulikuwa na kasoro nyingi ikiwemo kukosekana kwa orodha inayoonesha majina ya wapiga kura, jambo lililosababisha Mahakama kutokujua kama waleta maombi ni miongoni mwa wapiga kura.

Chanzo habarileo.