VIGOGO wa Chuo cha Utumishi wa Umma na wa Kampuni ya Magazeti ya Tanzania Standard (Newspapers) Limited (TSN), wamesimamishwa kazi kwa tuhuma za utendaji usioridhisha.
Uamuzi dhidi ya mabosi hao wa taasisi za serikali, ulichukuliwa jana na mamlaka zenye dhamana, huku upande wa Chuo cha Utumishi wa Umma, akiwa amesimamishwa Mkuu wa Chuo cha Utumishi wa Umma, Said Nassoro na kwa TSN akisimamishwa Mhariri Mtendaji, Gabriel Nderumaki.
Waziri wa Nchi, Ofisi ya Rais, Utumishi na Utawala Bora, Angela Kairuki alimsimamisha Mkuu huyo wa Chuo, Nassoro, kwa madai ya kushindwa kusimamia utendaji wa chuo na kusababishia Serikali hasara ya zaidi ya Sh bilioni moja.
Kwa upande wa TSN, Bodi ya Wakurugenzi ya Kampuni hiyo imemsimamisha kazi Mhariri Mtendaji wa taasisi, Gabriel Nderumaki kwa tuhuma ya utendaji usioridhisha.
Vigogo Utumishi
Licha ya Waziri Kairuki kumsimamisha Mkuu wa Chuo cha Utumishi wa Umma, Nassoro, pia amewasimamisha kazi watumishi wengine wawili ambao ni Mkuu wa Chuo hicho Kampasi ya Dar es Salaam , Joseph Mbwilo na aliyekuwa Mkuu wa Chuo hicho Kampasi ya Tabora, Silvanus Ngata ambaye amerejeshwa makao makuu ya utumishi wa umma.
Akizungumza na waandishi wa habari jana jijini Dar es Salaam, Kairuki alisema kutokana na Nassoro kushindwa kusimamia, utendaji wa chuo hicho umekuwa si wa kuridhisha hali iliyochangia baadhi ya watumishi wake kujiingiza kwenye ubadhirifu wa mali ya umma.
“Chuo hiki ni muhimu sana katika kuleta ufanisi wa utendaji kwa mtumishi wa umma, kutokana na utendaji huu usioridhisha umetoa mwanya kwa baadhi ya watendaji kufanya ubadhirifu,” alisisitiza Kairuki.
Akizungumzia ubadhirifu huo, Kairuki alisema mwaka 2011 hadi 2013, Ngata alijiongezea gharama za ujenzi wa jengo la chuo hicho tawi la Mtwara tofauti na fedha iliyokuwa imepangwa.
“Cha kushangaza, huyu Mkuu wa Chuo ambaye ni Nassoro baada ya kugundua kosa hilo, alishindwa kumwajibisha na badala yake alimhamishia tawi la Chuo cha Tabora akiendelea tena kama Mkuu wa chuo hicho,” alisema Waziri.
Aidha waziri huyo alisema amemsimamisha kazi Mbwilo kwa kitendo chake cha kutumia vibaya Sh bilioni moja za chuo hicho katika mwaka wa fedha wa 2013/3014 ambazo zilikuwa malipo ya ada.
Alisema licha ya ubadhirifu huo, Nassoro alimteua Mbwilo kuwa Kaimu Mkuu wa Chuo kwa upande wa fedha Kampasi ya Dar es Salaam. Kairuki alisema wizara yake itaendelea kusafisha watumishi wa umma wasio waaminifu. “Sisi tulio hapa utumishi wa umma ndio tunaoweka mifumo na miongozo mbalimbali ya utumishi. Ni lazima tuoneshe mfano,” alisisitiza.
Wakati Waziri Kairuki akitumbua majipu hayo, Mkuu huyo wa Chuo cha Utumishi wa Umma, Nassoro alikuwepo kwenye mkutano huo na wanahabari, hali ambayo ilionesha hakufahamu kitakachotokea.
Baada ya Waziri Kairuki kutoa taarifa hiyo, mtendaji huyo alisimama, akainama kama ishara ya kutoa shukurani ya heshima na kutoka ukumbini hapo akisindikizwa na watumishi wengine waliohudhuria mkutano huo.
Kuhusu TSN
Uamuzi wa kumsimamisha Mhariri Mtendaji wa TSN, Nderumaki, ulifanyika muda mfupi baada ya ziara ya Waziri wa Habari, Utamaduni, Sanaa na Michezo, Nape Nnauye aliyefika kwenye kampuni kuangalia utendaji na namna ya kuboresha utendaji wa kampuni. Kabla ya uamuzi huo kufanyika, Nape alizungumza na menejimenti katika kikao cha ndani na kisha akaitaka Bodi ya Wakurugenzi wa TSN iliyo chini ya Mwenyekiti, Profesa Moses Warioba kukaa kupitia hoja zilizoibuka kwenye kikao hicho.
“ Nimeiagiza bodi watafakari juu ya anayeongoza menejimenti , ukiangalia ripoti inaonekana kuna mgogoro mkubwa ndani ya menejimenti yenyewe, na kumekuwapo na malalamiko ya wafanyakazi,” Nape aliwaambia waandishi wa habari. Alisema, “Taarifa nilizokuwa nazo, niliiomba bodi iwepo ili tupitie pamoja maeneo dhaifu ya utendaji kazi katika kampuni. Naamini kuna uamuzi Bodi itayatengua.”
Waziri Nape alisema kutokana na ripoti, amebaini kuwapo matatizo makubwa, ikiwemo kukosekana mawasiliano kati ya bodi na menejimenti. Pia alibaini utendaji mbovu wa menejimenti, uliochangia kushusha ari ya kazi ya wafanyakazi.
“Kuna baadhi maamuzi yamefanywa na menejimenti ambayo yangetakiwa kufanywa na bodi na ili bodi iwe na maelekezo yake, na bahati mbaya sehemu kubwa yamefanyika bila ushiriki wa bodi na inaonekana hakuna mawasiliano mazuri kati ya bodi na menejimenti. Udhaifu huu umechangia kushusha morali (ari) ya wafanyakazi, ukiangalia wafanyakazi wanaocha kazi imeongezeka na ndiyo jambo ambalo limetushtua sana. Tunataka bodi ikae ilitafakari hilo,” alisema.
Waziri Nape aliahidi Februari 29 mwaka huu atakutana na kuzungumza na wafanyakazi wa TSN.
Uamuzi wa Bodi
Baada ya kikao cha Bodi cha takribani saa mbili, Mwenyekiti wa Bodi , Warioba alisema wameamua kumsimamisha Nderumaki, kupisha uchunguzi ambao utafanywa na Serikali.
“ Bodi imeamua kumsimamisha Mhariri Mtendaji ili kupisha uchunguzi stahiki na hatimaye hatua stahiki zichukuliwe na mamlaka yake ya ajira. Uchunguzi unafanywa kuangalia ni kwa nini hali imekuwa hivyo katika kampuni,” alisema.
Katika kipindi cha uchunguzi, nafasi ya Mhariri Mtendaji itashikiliwa na Tuma Abdallah ambaye kwa sasa ni Naibu Mhariri Mtendaji.
Uteuzi mwingine
Wakati huo huo, Bodi hiyo imetengua uteuzi uliofanywa na Mhariri Mtendaji kwa Madiya Magesa, aliyekuwa Kaimu Meneja wa Kiwanda wakimtaka arejee katika nafasi yake ya Uhasibu kutokana na kukosa sifa.
Magesa alipewa wadhifa huo kutokana na kusimamishwa kazi kwa Meneja wa Kiwanda, John Mcharo. Hata hivyo Warioba alisema taratibu za kisheria, zitafuata katika kumpata mtu atakayeshika wadhifa huo.
Pia, Bodi imetengua uteuzi wa Felix Mushi aliyeshikilia nafasi ya Kaimu Meneja Mauzo na Masoko, ambaye alisema mbali na kutokuwa na sifa, pia uadilifu wake unatiliwa shaka.
Awali, Mwenyekiti wa Bodi, Warioba alisema Waziri Nape alitoa maelekezo ya mambo mengi yaliyotakiwa kufanyiwa kazi, ikiwamo kutokuwapo kwa maelewano kati ya manejimenti, wafanyakazi na Chama cha Wafanyakazi (RAAWU).
Mengine ni, baadhi ya wafanyakazi kupewa majukumu ambayo hawana sifa, kumsimamisha kazi meneja wa kiwanda bila kufuata taratibu na kuangalia sababu za wafanyakazi zaidi ya 21 kuacha kazi katika kipindi cha muda mfupi.
Chanzo HabariLeo.
0 comments:
Post a Comment