Majipu yazidi kutumbuliwa

Waziri wa Nchi, Ofisi ya Rais Tamisemi, George Simbachawene
OFISI ya Rais, Tawala za Mikoa na Serikali za Mitaa (Tamisemi) imesema imebaini baadhi ya wakurugenzi watendaji na watendaji katika Manispaa nne, kutoa rushwa kwa maofisa wa Ofisi ya Mkaguzi na Mdhibiti wa Hesabu za Serikali (CAG), kuficha kasoro walizozibaini na kubadili hati chafu kuwa safi.
Aidha, Mkurugenzi Mtendaji wa Halmashauri ya Mji wa Tunduma, Halima Mpita amevuliwa madaraka yake kutokana na matumizi mabaya ya madaraka na upotevu wa fedha za ushuru wa magari.
Akizungumza jana Waziri wa Nchi, Ofisi ya Rais (Tamisemi), George Simbachawene alisema madudu hayo, ameyabaini baada ya kufanya ukaguzi wa kina.
“Tumebaini baadhi ya watumishi katika halmashauri zetu ambao wamekuwa wakitoa rushwa kwa maofisa wa CAG ili kushawishi wakaguzi kuficha kasoro walizoziona au waandikiwe hati safi pamoja na kuwa na kasoro nyingi. Ripoti hizi zimekuwa zikipelekwa bungeni na kujadiliwa wakati sio halisi,” alisema Simbachawene.
Misenyi mkoani Kagera
Simbachawene alisema Mkurugenzi Mtendaji wa Halmashauri ya Misenyi, Elizabeth Kitundu alimwagiza Mweka Hazina wake, Majaliwa Bikwaso kutoa Sh milioni tatu kwa maofisa wa CAG kwa nia ya kuwalainisha ili wafiche kasoro walizozibaini.
Aliwataja maofisa hao wa CAG w a l i o p e w a fedha hizo kuwa ni Steven Guwawa, John Elias na Kilembi Mkole.
Nanyumbu, Mtwara
S i m b a c h a w e n e alisema Juni 29, mwaka jana, Mkurugenzi Ally Mohamed Kasenge, Mweka Hazina Pascal Malowe na Mhasibu Emmanuel Mgesa, walimpatia Sh milioni 3.5 Ofisa wa Ukaguzi wa CAG, F. Mwampashi ambaye alipokea kwa niaba ya wenzake ili kuficha kasoro walizozibaini.
Mbogwe, Geita
Simbachawene alisema Novemba mwaka jana, Mkurugenzi Abdallah Mfaume na Mweka Hazina, Lucas Elias Ndombele waliwapa rushwa maofisa wa CAG Sh milioni 16 ili wafiche udhaifu walioubaini. Maofisa hao ni Mustafa Said, A.M Chanja, A. Moha na D.S Ndulima.
Alisema pia katika halmashauri hiyo, wakaguzi wa CAG walibaini matumizi ya zaidi ya Sh milioni 236.8 yalifanywa bila kuwapo nyaraka za kuthibitisha na Sh milioni 144.2 zililipwa kwa mkandarasi, bila kazi iliyokusudiwa kufanyika na wafanyakazi 82 walionekana katika orodha ya wafanyakazi hivyo k u l i p w a mishahara hewa.
“ N o - vemba 30, mwaka jana, kilifanyika kikao kati ya wakaguzi na uongozi wa halmashauri a m b a c h o k i l i h u d h u l i w a na Kaimu Mkurugenzi Sebastiani Nasoro aliyesema ameagizwa Mkurugenzi Abdalla Mfaume awapatie Sh milioni 12 ili kuficha kasoro na kupewa hati safi.”
Aliwataja maofisa wa CAG waliopewa fedha hizo kuwa ni Rejea Mataka, Abdallah Kisura, A.J Cheile, A. M. Chanja, Mustafa Said.
“Katika halmashauri hiyo pia, Felisia Shilembi ambaye ni mfamasia wa wilaya na mhasibu wa afya Calistusi Nyoni walitoa shilingi milioni 3 kwa A.J Chile mkaguzi wa mkoa wa Geita ili kuficha kasoro ya kupotea kwa fedha Sh milioni 90 zilizokuwa zinunue dawa na vifaa tiba.
Kilolo mkoa wa Iringa
Simbachawene alisema; “Agosti 23 mwaka jana, Lacosoni Pila wa Idara ya Fedha alimpa fedha Sh 245,000 Ofisa wa CAG ambaye hakumtaja jina ili afumbie macho kasoro alizoziona. “Naagizwa mamlaka husika za nidhamu kwa watu hawa kuwachukuliwa hatua na pia namuagiza Katibu Mkuu kuhakikisha anawashughulikia wakurugenzi waliohusika kwa kuwasimamisha ili kupisha uchunguzi wa huhuma dhidi yao.
“Nakemea tabia ya kubadili hati chafu na kuwa hati safi, kwani inakwamisha juhudi za serikali katika kuwaletea maendeleo wananchi wao. Hatuwezi kuendelea na watu wasiotaka kubadilika ambao wanaathiri maisha ya wananchi,” alisema.
Alipoulizwa kuhusu tuhuma za rushwa kwa wakaguzi kutoka kwenye ofisi yake, Mdhibiti na Mkaguzi Mkuu wa Hesabu za Serikali, Profesa Mussa Assad alisema ni mapema sana kwa ofisi yake kulizungumzia hilo.
Kuhusu Mamlaka ya Mji wa Tunduma, Simbachawene alisema: “Kwa mamlaka niliyonayo namvua madaraka Mkurugenzi wa Mji wa Tunduma, Halima Mpita kuanzia leo kutokana na matumizi mabaya ya madaraka, kwani waliweza hata kuwatumia watoto wake kwenye shughuli za halmashauri na kuwalipa posho na upotevu wa fedha za ushuru wa magari yanayopita mpakani.
Alisema nafasi ya Mpita sasa itashikiliwa na Eric Mapunda, ambaye kabla ya uteuzi huo alikuwa Mkuu wa Idara ya Utawala jiji la Mbeya.

Chanzo HabariLeo.