Marekani kuendelea kuchangia sekta za afya, elimu nchini

Balozi wa Marekani nchini, Mark Childress.

SERIKALI ya Marekani imesema itaendelea kutoa misaada katika sekta ya afya na elimu nchini, ikiwa ni mwendelezo wa kuimarisha ushirikiano wake na Tanzania.
Balozi wa Marekani nchini, Mark Childress alisema hayo jana jijini Dar es Salaam alipokutana na Waziri wa Mambo ya Nje, Afrika Mashariki, Kikanda na Kimataifa, Balozi Augustine Mahiga.
Childress akiwa ameongozana na viongozi wengine waandamizi wa ubalozi wa Marekani, walikutana na Mahiga kuzungumzia mambo mbalimbali ya ushirikiano wa nchi yao na Tanzania.
Alisema, Marekani itaendelea kutoa misaada yake kwa Tanzania na hususan kwenye sekta ya afya na elimu, lengo likiwa kuimarisha sekta hizo ili wananchi waweze kufanya kazi za uzalishaji na kuinua uchumi.
Aidha, katika mazungumzo hayo, walijadili jinsi ya kuimarisha masuala ya kidiplomasia na namna ya kuzidisa usalama wa kikanda, kuinua uchumi na kuhakikisha uhusiano baina ya mataifa hayo kwa manufaa ya nchi zao.

Chanzo HabariLeo.