RAIS John Magufuli na Rais Paul Kagame wamezindua Daraja la Kimataifa la Rusumo, linalounganisha Tanzania na Rwanda. Katika uzinduzi huo, Rais Magufuli alitoa agizo la kufuta vituo kadhaa vya ukaguzi wa magari ya mizigo yaendayo nchi za Maziwa Makuu vilivyoko Tanzania.
Vituo hivyo ni vilivyoko katika Barabara Kuu ya Dar es Salaam hadi eneo hilo la mpakani la Rusumo na kubakiza vituo vitatu pekee. Magufuli alitoa agizo hilo jana wakati wa uzinduzi wa daraja hilo pamoja na Kituo cha Pamoja cha Forodha (OSBP) mpakani hapo katika wilaya ya Ngara kwa upande wa Tanzania na eneo la Kirehe upande wa Rwanda.
Alitaja vituo vitakavyoendelea kufanya ukaguzi wa magari kuwa ni cha Rusahunga mkoa wa Kagera, Singida na Vigwaza mkoani Pwani. Alisema kuwepo kwa vituo vingi, kunasababisha msongamano na ucheleweshaji wa magari na bidhaa, zinazosafirishwa na nyingine kuharibika njiani, kabla ya kufika zinapopelekwa.
“Siku za nyuma kabla ya kuwepo miundombinu, kulikuwepo na ucheleweshwaji mwingine ulikuwa wa makusudi kwa kuendekeza rushwa na mwingine ukisababishwa na ukosefu wa miundombinu, kitu kinachotugharimu. Tunatumia muda mwingi na kuwepo vituo vingi njiani, jambo linalosababisha watu kusafiri kwa muda mrefu.
Safari ya siku mbili au tatu unatumia siku 15, sasa miundombinu ipo, tusimamie usafirishaji ili tuweze kupandisha uchumi wa nchi yetu na Afrika Mashariki na maendeleo ya wananchi wetu,” alisisitiza Magufuli.
Alisema kumekuwapo na tabia ya baadhi ya watu walioko barabarani kwenye vituo hivyo vya ukaguzi, kuwataka madereva wa magari ya mizigo yaendayo katika nchi za Maziwa Makuu kila wakitaka kuanza safari, lazima watenge fedha za rushwa kwa ajili ya kuacha katika kila kituo; na endapo hawatofanya hivyo, hulazimishwa kuleta magunia ya mkaa, mbuzi au kuku.
“Kuanzia leo nimepiga marufuku utaratibu huo, ndio maana nikaamua vituo vipungue na kubaki vitatu tu, pia kama mtu ataendelea kuendekeza rushwa hizo, aache kazi mara moja, hatuwezi kupata maendeleo kwa njia ya rushwa wala kukwamishana,” aliagiza Rais.
Kuhusu daraja hilo lililojengwa awali mwaka 1977 , alisema lilikuwa kikwazo cha kuharakisha maendeleo kwa nchi za Rwanda na Tanzania kutokana na kiwango chake, lakini, sasa limejengwa kimataifa pamoja na kituo cha OSBP.
Alisema ujenzi wa miundombinu hiyo, utaharakisha maendeleo ya nchi hizo, kwani huo ndio msingi wa ushirikiano wa kweli, unaotakiwa kuwepo kati ya nchi zinazounda Afrika Mashariki.
Magufuli alisema lengo la kuwepo vituo vya pamoja mipakani kama kilichozinduliwa jana na marais hao ni kuwezesha watu kufanya kazi kwa pamoja kwa ushirikiano wa kweli kati ya pande mbili, kwani asilimia 70 ya bidhaa za Rwanda hupitia Tanzania katika mpaka huo wa Rusumo.
Kufuatia uzinduzi huo, Magufuli aliwashauri wafanyabiashara wa Rwanda, kuendelea kupitisha bidhaa zao Tanzania ili kufanya asilimia hiyo kupanda na pia itasaidia nchi kuongeza mapato na kukua kwa uchumi kutokana fedha itakayokuwa ikitolewa katika shughuli hizo.
Aliwataka wafanyabiashara hao, kuona fursa nya kutumia daraja hilo na liwe chachu ya maendeleo kwa wananchi wa pande zote mbili kwani wote wanategemeana. Magufuli aliwataka wasitengane maana raia wa nchi hizo ni marafiki na ndugu wa muda mrefu na majirani kwa hiyo lazima wadumishe amani iliyopo kupitia ushirikiano huo.
Kwa upande wake, Rais wa Rwanda, Kagame alisema kuwepo kwa mradi huo ni jambo kubwa katika maendeleo ya Tanzania na nchi yake kwa hiyo amewashauri wananchi wa nchi hizo mbili kuendeleza amani iliyopo na kuzidi kumuomba Mungu kuepusha majanga yasiyo na manufaa kwa jamii hizo.
Mtendaji Mkuu wa Wakala wa Barabara nchini (Tanroads), Mhandisi Patrick Mfugale, akitoa taarifa juu ya mradi huo kwa marais hao, alisema kuwa daraja la zamani lililokuwa na upana wa mita tatu, lilikuwa likibeba tani 32 tu kwa wakati mmoja, wakati jipya lililozinduliwa, lina upana wa mita 9.5 na linabeba tani 180 kwa wakati mmoja.
Chanzo HabariLeo.
0 comments:
Post a Comment