WAZIRI Mkuu, Kassim Majaliwa amesema Serikali imeamua kuanza kazi kwa kupambana na wala rushwa kurejesha umoja, ili rasilimali zilizopo ziwanufaishe Watanzania wote.
Alisema katika mapambano hayo, wanalenga pia kushughulika na waliosababisha uwapo wa watumishi hewa baada ya kumaliza kuwabaini watumishi hao kote nchini.
“Jambo tuliloamua kuanza nalo ni kupambana na rushwa. Tumeamua kufanya hivyo kurudisha umoja na maelewano miongoni mwa Watanzania, tunataka tuibadili Tanzania iwe ni ya Watanzania wote… tumechoka kuambiwa sehemu fulani mradi umekamilika halafu ukienda kuangalia hukuti kitu na fedha ile haipo,” alisema na kushangiliwa na Watanzania waishio Uingereza.
Majaliwa alizungumza na Watanzania hao juzi kwenye mkutano uliofanyika kwenye Ubalozi wa Tanzania jijini London, Uingereza. Waziri Mkuu alikuwa nchini humo akimwakilisha Rais John Magufuli kwa mwaliko wa Waziri Mkuu wa Uingereza, David Cameron kuhudhuria mkutano wa kujadili namna ya kupambana na rushwa.
Alisema, Tanzania ina rasilimali nyingi na manufaa ya rasilimali hizo hayapaswi kuwa neema kwa wachache bali wananchi wote.
Akizungumzia suala la kusaka watumishi hewa, Majaliwa alisema Serikali itawashughulikia wale wote waliohusika katika hilo.
“Wafanyakazi hewa wamefikia zaidi ya 10,000 na tumeokoa zaidi ya Sh bilioni 4.5 zilizokuwa zikipotea kila mwezi. Tukikamilisha kusaka watumishi hewa, sasa tutataka kujua ni akina nani walikuwa wakipokea fedha hizo. Waliohusika tutashughulika nao,” alisisitiza.
Alisema hivi sasa Serikali inalenga kuwa na watumishi wanaofanya kazi kwa uaminifu, uadilifu na uwajibikaji mahali pa kazi.
“Hiki ndicho kipaumbele cha Serikali ya Awamu ya Tano na suala hili litakuwa endelevu”, alisema Majaliwa. Uchumi na viwanda Akizungumzia kuhusu ukuaji wa uchumi, Waziri Mkuu alisema, lengo la Serikali hivi sasa ni kuona kuna ukuaji wa uchumi unaoenda sambamba na huduma zinazotolewa kwa wananchi.
Majaliwa alisema, viwanda vingi viliuzwa na watu waliovinunua wakageuza kuwa ni maghala ya kufugia wanyama.
“Sisi tunataka vifufuliwe ili teknolojia mpya na za kisasa zije Tanzania. Nafasi ya kuwekeza iko kwa Watanzania wote walioko nyumbani na ninyi mlioko nje,” alisema.
Alisema, ardhi ipo ya kutosha na akawataka wawaalike marafiki zao kuwekeza nchini, ili mradi wawe ni watu makini, wenye nia ya dhati ya kuwekeza kwa mitaji na si madalali.
Alisema Serikali inataka usindikaji wa mazao na bidhaa ufanyike nchini badala ya kupeleka mazao ghafi nje ya nchi. Alisema kwa njia hiyo Tanzania itakuwa imezalisha ajira kwa wananchi wake.
“Kuna Watanzania wanaishi Botswana, Ujerumani na Poland wameshaleta wawekezaji nchini. Kwa mfano wa Poland wameleta mradi wa umeme katika vijiji vitano wilayani Ileje. Kwa hiyo ninyi endeleeni kuishi Uingereza lakini mhakikishe kuwa ukaaji wenu hapa unaleta tija kule nyumbani. Kumbukeni Tanzania na muwe tayari kuihudumia Tanzania,” alisema.
Bunge ‘Live’
Akijibu swali kuwa ana maoni gani juu ya Bunge kutorushwa ‘live’, Majaliwa alisema, hatua hiyo ilichukuliwa ili kuwawezesha watu kufanya kazi kama ambavyo kaulimbiu ya Rais Magufuli ya Hapa Kazi Tu inavyosema.
“Bunge la Tanzania lilikuwa ni pekee katika Jumuiya ya Afrika Mashariki na duniani ambalo lilikuwa likirushwa moja kwa moja kuanzia asubuhi hadi usiku. Ina maana katika kipindi cha Bunge la bajeti, ambalo linaendeshwa kila siku kwa miezi mitatu, Watanzania nao wangekuwa ‘Live’ kwa miezi mitatu,” alisema.
Alisema, walilazimika kujifunza kutoka kwenye mabunge mengine. “Hivi hapa Uingereza mnaangalia Bunge ‘live’ kila siku?” Alihoji Waziri Mkuu na kujibiwa kuwa linarushwa kwa kipindi kisichozidi dakika 15 wakati wa maswali kwa Waziri Mkuu pekee.
Akitoa ufafanuzi, aliwaeleza kuwa Bunge la Tanzania linarusha ‘live’ kila siku asubuhi wakati wa maswali ya kawaida na Alhamisi asubuhi wakati wa maswali kwa Waziri Mkuu, lakini mijadala yote hurekodiwa na kuhaririwa na kisha kurushwa kuanzia saa 8:00 hadi saa-9:00 mchana na saa 3:00 hadi saa 4:00 usiku kwa siku husika.
Waziri Mahiga alonga Naye Waziri wa Mambo ya Nje na Ushirikiano wa Afrika Mashariki, Kikanda na Kimataifa, Balozi Dk Augustine Mahiga alisema, kuitishwa kwa mkutano wa kupambana na rushwa nchini Uingereza ni moja ya jitihada za Waziri Mkuu wa nchi hiyo kuanzisha vuguvugu la uanaharakati wa mapambano dhidi ya rushwa.
“Kukosekana kwa utawala bora, changamoto za ugaidi, biashara za dawa za kulevya, biashara ya kusafirisha binadamu na uwepo wa rushwa na ufisadi ni baadhi ya mambo yaliyofanya dunia ibadilike. Haya mambo zamani yalikuwa hayana mahali pa kuzungumzwa, kwa hiyo vikao kama hivi vitasaidia kukabili tatizo hili,” alisema Balozi Mahiga.
Alisema rushwa ni kama pweza mwenye vichwa vingi na mikia mingi. Waziri Mkuu David Cameron ameamua kuanzisha jambo hilo kutafuta njia za kukabili janga hilo kubwa.
“Sote tunatambua kuwa mataifa mengi yangependa kuwemo katika hii ‘movement’ lakini ni faraja kuona kwamba Tanzania imo miongoni mwa waanzilishi na hii ni kwa sababu ya uongozi na ujasiri wa Rais Dk John Magufuli ambaye kwa kweli ni ‘game changer’ (akimaanisha kuwa amebadili mwelekeo wa Taifa hili) kwani ana utashi wa kisiasa na ana ujasiri wa kukemea maovu,” alisema huku akishagiliwa.
Mkurugenzi Mkuu Takukuru Kwa upande wake, Mkurugenzi Mkuu wa Taasisi ya Kuzuia na Kupambana na Rushwa (Takukuru), Valentino Mlowola alisema, vita ya rushwa nchini Tanzania ni endelevu na inafanyika kuitikia mwito alioutoa Rais Magufuli wakati akizindua Bunge la Tanzania Novemba 20, 2015.
Alisema wanatumia mbinu mbalimbali kupambana na rushwa lakini kubwa wanayoenda nayo hivi sasa ni kutoa elimu kwa watoto na vijana ili kuwabadilisha tabia na utamaduni uliojikita kwenye jamii.
Chanzo HabariLeo.
0 comments:
Post a Comment