‘Viongozi wa dini pigeni vita dawa za kulevya’

Waziri Mkuu Kassim Majaliwa akisalimiana aliyekuwa Mwenyekiti wa CCM wa Mkoa wa Shinyanga, Hamisi Mgeja na baadhi ya washiriki wa Baraza la Maulid baada ya kuhutubia baraza hilo kwenye ukumbi wa Karimjee jijini Dar es Salaam.

WAZIRI Mkuu Kassim Majaliwa amewataka Watanzania kuungana kwa pamoja na kushiriki katika vita ya dawa za kulevya, kwani ushiriki wao utaweza kumaliza vita hiyo, ambayo ni ngumu na inaliangamiza Taifa. Amesema uwezekano wa kutokomeza matumizi ya dawa za kulevya nchini upo, iwapo viongozi wa dini watakuwa mstari wa mbele kuhubiri madhara ya dawa hizo, ambazo zinaangamiza nguvu kazi kubwa ya taifa.
Majaliwa aliyasema hayo jana katika sherehe za Kuzaliwa kwa Mtume Muhammad, zilizoandaliwa na Baraza Kuu la Waislamu Tanzania (Bakwata), zilizofanyika katika viwanja vya Kariamjee jijini Dar es Salaam, ambapo pia viongozi mbalimbali walishiriki.
Alisema, wazazi na viongozi wa dini, wanapaswa kukemea na kuhubiri juu ya madhara ya dawa za kulevya mara kwa mara ili kuweza kuchangia katika kumaliza vita hiyo ambayo imekuwa ni tatizo linalowamaliza vijana wengi.
Aidha, Waziri Mkuu alizitaka taasisi za kidini, kuendelea kutoa huduma kwa jamii nzima bila ubaguzi ili kuweza kufikia malengo ya maendeleo yaliyopangwa, huku wakiifundisha jamii kuwa wachamungu ili kupunguza maovu.
“Kama kila mmoja atajua umuhimu wa kuwa Mcha Mungu, basi Tanzania itaendelea kuwa kisiwa cha amani. Mcha Mungu ni mtu ambaye anazingatia maadili na kufuata mafundisho yote ya Mwenyezi Mungu.
Hatutarajii kuona mcha Mungu anakuwa mstari wa mbele katika kutenda maovu na mambo yasiyompendeza Mungu, tutakapokuwa na wachaMungu wengi, maana yake hata maovu yatapungua,”alisema Majaliwa.
Alisema, kwa pamoja Tanzania inatakiwa kutokukubali kuwa na jamii isiyokuwa ya wacha Mungu, ambapo aliwataka viongozi wa dini kuhakikisha wanaiongoza jamii ili iweze kuishi katika uhuru, umoja na mshikamano.
“Tuna jukumu kubwa la kuhakikisha watu wetu wanaishi kwa uhuru, umoja na mshikamano, kwani hakuna taifa lililoweza kupiga hatua bila kushikamana, kama wanavyosema umoja ni nguvu... tushikamane ili tuweze kufikia malengo ya kuwa na maendeleo,” alisema.
Mufti wa Tanzania, Sheikh Mkuu Abubakari Zubeir alisema Bakwata na waislamu wote nchini, wanaunga mkono juhudi na hatua zinazochukuliwa na Serikali ya Awamu ya Tano, inayoongozwa na Rais John Magufuli katika kupiga vita ufisadi.
Alisema ufisadi ni jambo ambalo halikubaliki, kwani hata Kitabu Kitakatifu cha Quran, kimeeleza jinsi gani Mwenyezi Mungu anavyochukizwa na watu wanaofanya uharibifu. “Katika Quran....Mwenyezi Mungu kaeleza wazi jinsi anavyochukizwa na uharibifu, na ufisadi ni uharibifu kwa maana hiyo wanaofanya ufisadi wanaenda kinyume na maamrisho ya Mwenyezi Mungu,” alisema Sheikh Zubeir.
Aliwataka waislamu kukumbuka na kuyafuata mafundisho ya Mtume Muhammad, kwani miongoni mwa mafundisho hayo ni tabia njema, maadili na kutenda wema, pia Waislamu kuwa chanzo cha amani na salama mahali popote.
Alisema Waislamu hawana budi kuendelea kuishi kwa amani na utulivu, kwani vitendo vya chuki si mafunzo ya Kiislamu na yanamchukiza Mwenyezi Mungu. Hata hivyo, aliomba Serikali kutambua mchango wa viongozi na taasisi za dini katika kuchangia, amani, utulivu na maendeleo katika Taifa.
Pia kutambua dhamana yao katika jamii na kuwashirikisha katika mambo mbalimbali ili kuepusha migongano katika jamii.

Created by Gazeti la HabariLeo.