Mambo mengi hayahitaji kumsubiri Magufuli

RAIS John Magufuli, juzi aliendelea kudhihirisha kuwa serikali yake haitakuwa na simile kwa watendaji wazembe baada ya kuivunja Bodi ya Wakurugenzi ya Hospitali ya Taifa ya Muhimbili (MNH) pamoja na kumuondoa madarakani Kaimu Mkurugenzi Mkuu wa hospitali hiyo, Dk Hussein Kidanto.
Kaimu mkurugenzi huyo amerudishwa Wizara ya Afya na Ustawi wa Jamii kwa ajili ya kupangiwa kazi nyingine na sasa Profesa Lawrence Mseru wa Taasisi ya Mifupa (MOI) atakaimu nafasi hiyo.
Dk Magufuli alichukua hatua hiyo kutokana na kusikitishwa na taarifa ya kutofanya kazi kwa mashine za CT- Scan na MRI kwa takribani miezi miwili huku mashine kama hizo zikifanya kazi katika hospitali za watu binafsi.
Rais pia alisikitishwa na hali ya huduma kwa wagonjwa, hususan wanaolala chini. Kinachojitokeza ni kwamba rais hakupata maelezo ya kuridhisha ni kwa nini mashine hizo muhimu zimeshindwa kutengenezeka kwa muda mrefu kiasi hicho.
Ingawa sababu ya kutotengenezwa kwa mashine hizo kwa wakati inaweza kuwa uzembe, lakini inaweza pia kuwa kile kinachodaiwa mitaani kwamba zimekuwa zikiharibiwa kwa makusudi ili watendaji wake wafaidike kwa mlango wa nyuma na zile zilizo katika hospitali binafsi.
Mtu anaweza kuelewa kwamba wagonjwa wanaofika kwenye hospitali hiyo ya Taifa (MNH) ni wengi kuliko idadi ya vitanda vilivyopo na ndio maana wanalazimika wengine kulala chini. Lakini inakuwa vigumu kuelewa pale mashine muhimu zinapoharibika mara kwa mara kwenye hospitali hiyo kubwa ya umma pekee, huku kwenye hospitali binafsi hali ikiwa kinyume chake.
Ikumbukwe kwamba mashine hizo zinapoharibika (kama kweli zinaharibika), zinachangia pia ongezeko la mrundikano wa wagonjwa wanaolazimika kusubiri huduma inayopatikana kwenye mashine hizo, hasa wanapokuwa hawana uwezo wa kwenda kwenye hospitali binafsi ambako gharama za vipimo ni ghali.
Sakata la Muhimbili linatufundisha mengi; moja ni umuhimu wa kuboresha zaidi hospitali za mikoa na wilaya ili kupunguza mrundikano kwenye hospitali za rufaa. Lakini kubwa ni kwamba yapo mambo ndani ya uwezo wa watendaji katika taasisi za umma, lakini hayatekelezwi kutokana na uzembe au ubinafsi tu.
Tunaamini kwamba, mbali na kuachana na utendaji kazi wa mazoea, hospitali zote kubwa zitaanza kutenga sehemu ya mapato yake kwa ajili ya kuhudumia mashine zake kwa matengenezo ya kawaida ya mara kwa mara kama serikali ilivyoagiza.
Lakini, kubwa ni watumishi wa umma kila mahali nchini kubadilika kwa kufanya kazi kwa bidii na maarifa wakihakikisha wanatekeleza majukumu yao kwa asilimia 100. Hii itaongeza tija na kunyanyua uchumi na hivyo hakuna mashaka kwamba hata kipato chao kitaongezeka muda si mrefu.
Kila mtumishi wa umma akitimiza wajibu wake, kwa maana ya kutoa huduma nzuri na kuwaheshimu wananchi ambao ndio walipaji wa mishahara kupitia kodi zao, hakutakuwa na hofu ya kutenda kazi kwa mashaka kwamba ni lini itakuwa zamu yao ya kutembelewa bila taarifa na Rais Magufuli kwani atakutaka kila kitu kiko sawa.

Creadit by Gazeti la HabariLeo