Kila la heri Bunge la 11

LEO ni siku nyingine muhimu katika historia ya Serikali ya Awamu ya Tano nchini, ambapo Bunge la 11 la Jamhuri ya Muungano wa Tanzania linaanza kazi yake rasmi mjini Dodoma.
Wabunge wataanza kazi yao ya kwanza kwa kumchagua Spika wa Bunge hilo atakayeliongoza kwa miaka mitano ijayo, kisha kuapishwa kwake na hatimaye yeye kuwaapisha wabunge wenyewe.
Hakuna ubishi kwamba tukio la leo linafuatia mchakato ulioanza siku nyingi, ikiwa ni pamoja na vyama vya siasa kuteua wagombea wao katika nafasi za udiwani, ubunge na urais, kuteuliwa rasmi na Tume ya Uchaguzi ya Taifa (NEC), kugombea nafasi hizo katika kura za maoni, kuanza kwa kampeni na hatimaye kufanyika kwa uchaguzi mkuu wenyewe Oktoba 25.
Tuna kila sababu ya kujivuna kwamba mchakato mzima ulikwenda vizuri kwa amani na utulivu hadi kupatikana kwa viongozi hao wote katika nchi yetu, ukiacha maeneo na majimbo machache ambayo yanarudia uchaguzi kutokana na sababu mbalimbali za msingi.
Hatua ya kumchagua Spika wa Bunge la 11 inayofanyika leo, ni sehemu ya mchakato mzima wa uundaji wa Serikali ya Awamu ya Tano kwa mujibu wa katiba ya nchi yetu. Mchakato wa kumtafuta Naibu Spika nao uko mbioni.
Tunapenda kuwakumbusha waheshimiwa wabunge wateule kuzingatia utamaduni wetu tuliojijengea sisi kama Watanzania wa kuendesha mambo yetu muhimu yanayohusu nchi yetu kwa amani, utulivu na mshikamano na pale ambapo tutabishana basi tufanye kwa msingi wa hoja yenye mashiko kwa taifa letu na siyo hoja ya nguvu.
Tunafahamu kwamba vyama na hata watu binafsi wanashindania nafasi hiyo nyeti. Lakini ni ukweli pia kwamba kujitokeza wagombea zaidi ya mmoja katika kinyang’anyiro hicho ni kipimo tosha, kwamba tuna kila sababu ya kumchagua Spika makini atakayekuwa na uwezo wa kuliongoza Bunge letu kwa weledi, umakini, busara na uvumilivu unaostahiki tukizingatia kwamba wabunge wetu safari hii wametoka katika mchanganyiko mkubwa wa vijana, wenye umri wa kati na wazee.
Wakati tunawatakia kila la heri wabunge wetu kutupatia Spika makini, tunawaomba busara itawale ili shughuli yote ifanyike kwa mujibu wa sheria na katiba ya nchi yetu, kwa amani, utulivu na mshikamano.
Pamoja na ukweli wa utofauti wa itikadi za vyama mbalimbali, jambo la msingi hapa ni kumpata mwenye uwezo na sifa stahiki ya kutuongoza kwa lengo la kuendeleza demokrasia ya vyama vingi nchini mwetu bila kuleta mifarakano.
Tunawatakia uchaguzi wa amani wa Spika wa Bunge la 11 la Jamhuri ya Muungano wa Tanzania, Naibu Spika na pia kuthibitisha jina la Waziri Mkuu litakaloletwa kwao na Rais John Magufuli

Created by gazeti la HabariLeo.