Wabunge wasifu hotuba ya Magufuli

WABUNGE wamesifu hotuba ya ufunguzi wa Bunge la 11 iliyotolewa bungeni jana na Rais wa Awamu ya Tano, Dk John Magufuli. Hotuba hiyo ni ufunguzi rasmi wa Bunge la 11, ambapo mkutano wa kwanza wa bunge hilo ulianza Jumanne wiki hii mjini hapa.
“Ni hotuba nzuri sana, ambayo naonesha dira ya kule tunakotaka kwenda, nampongeza sana Rais sasa ni suala la utekelezaji,“ alisema Mbunge wa Bukene, Selemani Zedi (CCM).
Naye Mbunge wa Kigoma Mjini, Zitto Kabwe (ACT Wazalendo), ambaye alikuwa mbunge pekee wa upinzani aliyekuwepo ukumbini wakati hotuba hiyo ikisomwa, alipongeza hotuba hasa katika suala la viwanda kwamba ni moja ya maeneo ambayo naye alikuwa akiyapigia kelele.
Alisema pia Rais ametaja changamoto nyingi zilizopo katika jamii na kwamba tayari bunge lishazinduliwa basi ni jukumu la kwenda kufanya kazi, huku pia akipongeza suala la kudhibiti matumizi ya fedha za serikali.
Naye Mbunge wa Chalinze, Ridhiwani Kikwete (CCM) alipongeza hotuba hiyo kwa kusema inaonesha jinsi gani Rais Magufuli alivyopania kuwasaidia Watanzania na kwamba kilichobaki sasa ni kwa watendaji kufanya utekelezaji. Mbunge wa Korogwe Mjini, Stephen Ngonyani (CCM), alisema hotuba hiyo haina ilichobakisha na sasa ni suala la kufanya kazi tu ili kutekekeleza yaliyozungumzwa.
Kwa upande wake Mbunge wa Morogoro Kusini Mashariki, Mgumba Omary (CCM), alisema hotuba hiyo ni dira nzuri kwa Taifa hasa suala la elimu, viwanda, nishati ya gesi na vipaumbele vingine mbalimbali. yakati tofauti walisifu hotuba hiyo ni Mbunge wa Mtama, Nape Nnauye, Mbunge wa Nzega Vijijini, Dk Hamis Kigwangwala wote wa CCM wakisema imeonesha wapi Serikali ya Awamu ya Tano inakotaka kuipeleka nchi.
“Ni moja kati ya hotuba bora kabisa, imegusa maeneo yote, Rais amezungumza kwa msisitizo na unaona kabisa kwamba ana nia ya dhati ya kuwaletea Watanzania maendeleo,” alisema Dk Kigwangwala.
Naye Spika wa Bunge, Job Ndugai, alisifu hotuba hiyo na kusema wabunge wataijadili katika kikao kijacho kinachotarajiwa kuanza Januari 20, mwakani. Kwa upande wakati akisoma hotuba ya kuahirisha bunge, Waziri Mkuu, Majaliwa Kassim Majaliwa, alisema hotuba hiyo ni ya aina yake na kwamba Rais ameeleza kwa kina kuhusu wajibu kujenga nchi.
“Nimpongeze sana Mheshimwa Rais kwa hotuba yake nzuri, ambayo ndiyo muongozo wetu kuanza kutekeleza majukumu yetu,” alisema.

Created by gazeti la habariLeo