Ukawa leo Jangwani

Mkurugenzi wa Manispaa ya Ilala, Isaya Mngurumi

CHAMA cha Demokrasia na Maendeleo (CHADEMA) kwa kushirikiana na muungano wa vyama vingine vitatu vinavyounda umoja uliobatizwa jina la Ukawa, leo kinatarajiwa kuzindua kampeni zake katika viwanja vya Jangwani jijini Dar es Salaam.
Chama hicho kimetamba kufanya ufunguzi wa kampeni wa kihistoria.
Hatua hiyo imekuja baada ya chama hicho kuruhusiwa na Mkurugenzi wa Manispaa ya Ilala, Isaya Mngurumi, kutumia uwanja huo ambao awali manispaa hiyo ilikuwa imetoa kibali kwa Chama Cha Mapinduzi (CCM) kufanya tamasha lake.
Mapema, Mkurugenzi huyo alisema, manispaa yake ilikuwa imetoa kibali kwa CCM kutumia uwanja huo kwa ajili ya tamasha walilopanga kufanya, ambapo hata hivyo baada ya majadiliano kati ya manispaa hiyo na Tume ya Taifa ya Uchaguzi (NEC) walikubaliana mkutano wa Chadema ufanyike leo kama ilivyopangwa.
Alisema pia walizungumza na viongozi wa CCM ili kuwaomba wawaachie Chadema uwanja huo ili wafanye ufunguzi wa kampeni zao ambapo chama hicho kilikubali kufanya hivyo.
Mgombea wa Urais wa chama hicho ni Edward Lowassa anayewakilisha mwamvuli wa Ukawa anaoungwa mkono na vyama vya CUF, NCCR-Mageuzi na NLD.
Lowassa jana alikutana na kuzungumza na makundi mbalimbali ya wafanyabiashara, waendesha bodaboda, mama lishe, wasanii na makundi mengine ambapo aliwataka kuhakikisha wanajitokeza kwa wingi katika ufunguzi wa kampeni hizo.
Aliyaambia makundi hayo kuwa matatizo yao anayafahamu hivyo wasiwe na wasiwasi kwani anawaahidi kuyashughulia atakapopata ridhaa yao.
Aidha, alisisitiza suala la amani ya nchi ambapo alisema, amani iliyopo kila mmoja ana wajibu wa kuilinda kwani endapo itatoweka watakaopata shida ni watu wote na hasa akinamama. “Yapo mambo mengi yanayotokea, vikwazo vya hapa na pale lakini nawaambia nchi yetu ina amani sana na kila mmoja ana wajibu wa kuilinda amani iliyopo,” alisema Lowassa.
Alisema hakujiunga na Chadema kwa ajali bali kwa lengo la kuhakikisha analeta mabadiliko na kuahidi kuwa endapo atapata nafasi atakwenda kwa kasi kuhakikisha analeta mabadiliko hayo. Akizungumzia kuhusu elimu alisema itakuwa ni moja ya jukumu lake la msingi kwani elimu ni ‘kila kitu’ katika kuleta maendeleo ya nchi.
“Elimu itakuwa ni bure kwani wenzetu (nchi nyingine) wamewezaje na sisi tushindwe? Nchi kama Marekani wamewezaje? Kipaumbele changu cha kwanza ni elimu, cha pili ni elimu na cha tatu ni elimu,” alisema.
Kwa upande wake, mgombea mwenza wa chama hicho, Haji Duni alisema, atahakikisha Lowassa anatimiza ahadi yake ya kutoa elimu bure kuanzia msingi hadi vyuo vikuu.
Mwenyekiti wa Chadema, Freeman Mbowe alisema, uzinduzi wa kampeni hizo utakuwa ni wa kipekee kwani wamejipanga kuhakikisha mazingira ya viwanja hivyo yanakuwa mazuri kwa kila mwananchi atayefika kwenye kampeni hizo.
Created  by gazeti leo